მოსწავლის მკვლელობაში ბრალდებული არასრულწლოვანი პოლიციას ჩაბარდა - პირველი კადრები ადგილიდან - პალიტრა ვიდეო

თბილისში, ხორავას ქუჩაზე მომხდარ მკვლელობაში ბრალდებული არასრულწლოვანი, რომელიც ამ დრომდე მიმალვაში იმყოფებოდა, საგამოძიებო უწყებას ჩაბარდა. ამის შესახებ "ინტერპრესნიუსის" კორესპონდენტი შინაგან საქმეთა სამინისტროდან იუწყება. ძებნილი გ.ჯ. შინაგან საქმეთა სამინისტროში ეს წუთია გამოცხადდა.

როგორც "პალიტრავიდეოს" ბრალდებულის ადვოკატმა ტარიელ კაკაბაძემ განუცხადა, ოჯახმა ახლახან დაადგინა ბრალდებულის ადგილსამყოფელი და მყისიერად მიიღო გადაწყვეტილება, რომ გ.ჯ. საგამოძიებო ორგანოში წარედგინათ, რომ ბრალდებულმა ითანამშრომლოს გამოძიებასთან და დაეხმაროს საგამოძიებო ორგანოებს ნათელი მოეფინოს მომხდარ ტრაგედიასთან დაკავშირებულ ყველა დეტალს.

გ.ჯ.-ს დღეს აღკვეთის ღონისძიების სახით პატიმრობა დაუსწრებლად შეეფარდა. პატიმრობაში რჩება კიდევ ერთი არასრულწლოვანი, რომელიც განზრახ მკვლელობის ბრალდებით პოლიციამ მომხდარიდან რამდენიმე საათში ცხელ კვალზე დააკავა.

რაც შეეხება საქმეზე დაკავებულ სხვა პირებს, უწყების მიერ გავრცელებული ინფორმაციით, გარდა არასრულწლოვნებისა, ასევე დაკავებულია სამი პირი დანაშაულის დაფარვისა და შეუტყობინებლობისთვის. ასევე, უწყებაში არ გამორიცხავენ, რომ სისხლის სამართლის პასუხისგებაში მისაცემ პირთა წრე გაიზარდოს.

ავტორი: ნიკა საჯაია