აჰმედ ჩატაევის ადგილსამყოფელის დასადგენად თურქეთის ხელისუფლება დახმარებას ოფიციალურ ვაშინგტონს სთხოვს - პალიტრა ვიდეო

აჰმედ ჩატაევის ადგილსამყოფელის დასადგენად თურქეთის ხელისუფლება დახმარებას ოფიციალურ ვაშინგტონს სთხოვს. ამის შესახებ ამერიკელ ოფიციალურ პირზე დაყრდნობით "უოლ სტრიტ ჯორნალი" წერს. გამოცემის ცნობით, ამერიკელი მაღალჩინოსანი აცხადებს, რომ შეერთებული შტატებისა და თურქეთის სადაზვერვო სამსახურების პირველადი კვალი მიუთითებს, რომ სტამბოლის აეროპორტში მომხდარი აფეთქებების სერიის უკან სწორედ "ისლამური სახელმწიფოს" ჩეჩენი მებრძოლი, აჰმედ ჩატაევი დგას. "უოლ სტიტ ჯორნალის" ცნობით, მიუხედავად იმისა, რომ თურქეთის ხელისუფლება მომხდართან ჩატაევის კავშირს ოფიციალურად ამ დრომდე არ ადასტურებს, შეერთებული შტატების სპეცსამსახურში აცხადებენ, რომ ამ ეტაპზე სხვა მოსაზრება არ არსებობს.

ახმედ ჩატაევის საკითხზე კომენტარს აკეთებს საქართველოში შეერთებული შტატების ელჩი. იან კელის განცხადებით, ამერიკულ მხარეს არ აქვს იმის დამადასტურებელი ინფორმაცია, რომ ჩატაევი სტამბოლის ტერაქტების ორგანიზატორია. ინფორმაცია ამის შესახებ კი თავად დიპლომატმა მედიით შეიტყო. რაც შეეხება ქართულ სპეცსამსახურებთან თანამშრომლობას, ელჩის განცხადებით, ამ მიმართულებით შეერთებულ შტატებს და საქართველოს კარგი ურთიერთობა აქვთ.