16 წლის რუსმა მოციგურავემ ფენომენალური სრიალით მსოფლიო რეკორდი მოხსნა და ჩემპიონი გახდა
ბოსტონში ფიგურულ სრიალში მიმდინარე მსოფლიო ჩემპიონატი დასრულდა. ქალებს შორის ოქროს მედალი 16 წლის რუსმა მოციგურავემ ევგენია მედვედევამ მოიპოვა, რომლის მწვრთნელი ეთერი თუთბერიძეა. ევგენიამ თავისუფალ პროგრამაში 150.10 ქულა აიღო და იუნა კიმის მიერ 2010 წელს ზამთრის ოლიმპიადაზე დამყარებული რეკორდი გააუმჯობესა. საბოლოოდ 223.86 ქულით მედვედევამ პირველი ადგილი დაიმსახურა. მეორე ადგილზე ყველასათვის მოულოდნელად ამერიკელი ეშლი ვაგნერი გავიდა, რომელმაც არაჩვეულებრივად ისრიალა და 215.39 ქულა მიიღო. ხოლო მესამე ადგილი ასევე რუსმა ანა პოგორილაიამ დაიმსახურა 213.69 ქულით.