მდიდრული სასახლე 2 ნავმისადგომით, კინოთეატრით და ბარით - გიორგი ბაჩიაშვილმა მაიამიში ვილა რეკორდულ თანხად, 51.5 მილიონ დოლარად გაყიდა: რას წერს New York Post?
გიორგი ბაჩიაშვილმა მაიამიში ვილა 51.5 მილიონ დოლარად გაყიდა, - ინფორმაციას New York Post-ი ავრცელებს.
New York Post-ის ინფორმაციით, „თანაინვესტირების ფონდის“ ყოფილმა ხელმძღვანელმა გიორგი ბაჩიაშვილმა მაიამიში, ჰიბისკუსის კუნძულზე ახლად აშენებული ვილა რეკორდულ თანხად, 51.5 მილიონ დოლარად გაყიდა.
South Hibiscus Drive-ის 270 ნომერში მდებარე თანამედროვე სასახლეს აქვს ხუთი საძინებელი, მოსამსახურის ოთახი, ექვსი სრულფასოვანი და ორი დამატებითი სველი წერტილი, სამუშაო კაბინეტი და სპორტული დარბაზი. სახლს ასევე აქვს 120 ფუტის (დაახლოებით 36,5 მეტრის) სიგრძის წყლისპირა ტერიტორია. ინტერიერში მოწყობილია დიდი ფოიე, მისაღები ოთახი და შეფ-მზარეულისთვის განკუთვნილი სამზარეულო.
სახლს აქვს იზოლირებული კერძო კინოთეატრი ბარით. ტერიტორიაზე ასევე არის საცურაო აუზი და ორი კერძო ნავმისადგომი, სადაც სულ მცირე, ერთი 105 ფუტის (დაახლოებით 32 მეტრის) სიგრძის იახტის მიღებაა შესაძლებელი.
გამოცემის ცნობით, ბაჩიაშვილმა ვილის გაყიდვის შესახებ განცხადება აგვისტოს შუა რიცხვებში განათავსა. თავდაპირველად, ვილა 55 მილიონ დოლარად იყიდებოდა, თუმცა განცხადების გამოქვეყნებიდან 11 დღის შემდეგ უცნობმა მყიდველმა 51.5 მილიონ დოლარად შეიძინა.
ასევე, NYP-ი წერს, რომ ბაჩიაშვილმა ვილა 2021 წელს 19 მილიონ დოლარად შეიძინა, რომელიც „დაუსრულებელი და მშენებლობის პროცესში იყო“.
ბაჩიაშვილის ადვოკატმა, პიტერ ჯ. სალასმა გამოცემას განუცხადა, რომ მისი კლიენტის ადგილსამყოფელი საიდუმლოდ რჩება.
შეგახსენებთ, „თანაინვესტირების ფონდის“ ყოფილი ხელმძღვანელი გიორგი ბაჩიაშვილი 2026 წლის 18 თებერვალს გათავისუფლდა. პროკურატურაში განაცხადეს, რომ ბაჩიაშვილმა ყველა სისხლის სამართლის საქმეზე დანაშაული აღიარა, აანაზღაურა ზიანი და გაუფორმდა საპროცესო შეთანხმება.
ცნობისთვის, სახელმწიფო უსაფრთხოების სამსახურმა გიორგი ბაჩიაშვილი 2025 წლის მაისში დააკავა. ბაჩიაშვილი მსჯავრდებული იყო „ქართული ოცნების“ დამფუძნებლის, ბიძინა ივანიშვილის კრიპტოვალუტის მითვისებაში. მას ამ საქმეზე 11 წლით თავისუფლების აღკვეთა ჰქონდა მისჯილი.
ბაჩიაშვილი მსჯავრდებული იყო კიდევ ერთ საქმეზე, რომელიც სახელმწიფო საზღვრის უკანონოდ გადაკვეთას გულისხმობს. მას სასჯელის სახით 4 წლითა და 6 თვის ვადით თავისუფლების აღკვეთა ჰქონდა მისჯილი.
ასევე, გიორგი ბაჩიაშვილს „მტკვარი ჰესის“ საქმეზე ბრალდება საქართველოს სსკ-ის 2201-ე მუხლის მე-2 ნაწილით ჰქონდა წარდგენილი, რაც სპეციალური უფლებამოსილების მქონე პირის მიერ სამსახურებრივი მოვალეობის შეუსრულებლობას ან არაჯეროვნად შესრულებას გულისხმობს, რამაც მძიმე შედეგი გამოიწვია.