ცნობილია, მუხრანში მომხდარ, ორმაგ მკვლელობაში ბრალდებულების ვინაობა - “გლოვაა ჩვენს სოფელში და ყველა საშინლად განიცდის"
მცხეთის რაიონის, სოფელ მუხრანში 2 ადამიანის მკვლელობის ბრალდებით სამართალდამცავებმა ორი პირი დააკავეს. არსებული ინფორმაციით, დანაშაულში მხილებული პირები ადგილობრივები არიან. როგორც საზოგადოებისთვის ცნობილია, დანაშაული 24 იანვარს მუხრანის ცენტრში ხალხის თვალწინ მოხდა - ჩაცხრილეს მუხრანის მაცხოვრებლები ზურა სანამაშვილი და გია ქილარჯიანი, რის შემდეგ დამნაშავეები შემთხვევის ადგილიდან მიიმალნენ.
შინაგან საქმეთა სამინისტროს ინფორმაციით, სამართალდამცავებმა მკვლელობაში ბრალდებული და მისი თანმხლები პირი უკვე დააკავეს. უწყების ინფორმაციით, დაკავებულები წარსულში ნასამართლევი პირები არიან.
“შინაგან საქმეთა სამინისტროს მცხეთა-მთიანეთის პოლიციის დეპარტამენტის საგამოძიებო სამმართველოს თანამშრომლებმა, დამამძიმებელ გარემოებაში ჩადენილი განზრახ მკვლელობისა და ცეცხლსასროლი იარაღის მართლსაწინააღმდეგო შეძენა-ტარების ბრალდებით, წარსულში ნასამართლევი 2 პირი: 1982 წელს დაბადებული ს.ც. და 1986 წელს დაბადებული ი.მ. დააკავეს. გამოძიებით დადგინდა, რომ ერთ-ერთმა ბრალდებულმა, თანმხლებ პირთან ერთად, მიმდინარე წლის 24 იანვარს, მცხეთის მუნიციპალიტეტში, ცეცხლსასროლი იარაღიდან რამდენიმე გასროლით სასიკვდილო ჭრილობები მიაყენა - 1980 წელს დაბადებულ ზ.ს.-ს და 1985 წელს დაბადებულ გ.ქ.-ს. დამამძიმებელ გარემოებებში ჩადენილი დანაშაულის შემდეგ ორივე ბრალდებული შემთხვევის ადგილიდან მიიმალა. პოლიციამ საქმეზე ჩატარებული ოპერატიული ღონისძიებებისა და საგამოძიებო მოქმედებების შედეგად, დანაშაულში მონაწილე ორივე პირი ბრალდებულის სახით დააკავა. გამოძიება სისხლის სამართლის კოდექსის 109-ე და 236-ე მუხლებით მიმდინარეობს, რაც 20 წლამდე ან უვადო თავისუფლების აღკვეთას ითვალისწინებს", - აღნიშნულია განცხადებაში. განაგრძეთ კითხვა