"ბათუმში 48 წლის ქალი დაიღუპა ანაფილაქსიის გამო" - რა იწვევს ანაფილაქსიურ შოკს და რომელია მისი ყველაზე საგანგაშო, პირველადი ნიშანი?
ანაფილაქსიური შოკი წამლებისგან - საფრთხე, რომელიც წამებში ვითარდება.
ანაფილაქსიური შოკი ერთ-ერთი ყველაზე მძიმე ალერგიული რეაქციაა, რომელიც შესაძლოა წამლის მიღების შემდეგ რამდენიმე წუთში განვითარდეს. სპეციალისტების თქმით, ეს მდგომარეობა სიცოცხლისთვის უკიდურესად საშიშია და დაუყოვნებლივ სამედიცინო დახმარებას საჭიროებს.
ანაფილაქსიური შოკი ვითარდება მაშინ, როდესაც ორგანიზმში ალერგენი ხვდება და იმუნური სისტემა მასზე უკიდურესად მძაფრად რეაგირებს. ყველაზე ხშირი გამომწვევებია:
მწერის ნაკბენი და ნესტარი - განსაკუთრებით ბზიკის, ფუტკრისა და კრაზანას;
საკვები პროდუქტები - თხილი, არაქისი, ზღვის პროდუქტები, კვერცხი, რძე;
მედიკამენტები - ანტიბიოტიკები, ასპირინი და სხვა;
რისკის ქვეშ არიან ადამიანები, რომლებსაც ადრე ალერგიული რეაქცია ჰქონიათ წამლებზე.
ალერგენის ზემოქმედების შედეგად ორგანიზმი გამოყოფს ქიმიურ ნივთიერებებს, რომლებიც სისხლძარღვებს აფართოებს, არტერიულ წნევას მკვეთრად ამცირებს და სასუნთქ გზებს ავიწროებს. თუ ეს პროცესი დროულად არ შეჩერდა, პაციენტის სიცოცხლე სერიოზული საფრთხის წინაშე დგება.
ანაფილაქსიის სიმპტომები, როგორც წესი, ძალიან სწრაფად - ალერგენთან კონტაქტიდან რამდენიმე წუთში - ვლინდება. ბზიკის ნაკბენის შემდეგ სახის, ტუჩების ან ენის შეშუპება უკვე საგანგაშო ნიშანია, რომელიც სასუნთქი გზების შევიწროებაზე მიუთითებს.