პაატა ბურჭულაძის ოჯახი სოციალურ ქსელში მიმართვას ავრცელებს - პალიტრა ვიდეო

პატიმრობაში მყოფი მოძრაობა "რუსთაველის გამზირის" ერთ-ერთი ლიდერის, პაატა ბურჭულაძის ოჯახი სოციალურ ქსელში მიმართვას ავრცელებს.

"ყველას დიდ მადლობას გიხდით მხარდაჭერისთვის!

დროებით პაატა ბურჭულაძის გვერდს ვმართავთ ჩვენ, მისი ოჯახი.

სამშობლოს სამსახურში! 314 დღე!" - ნათქვამია მიმართვაში.

ცნობისთვის, პაატა ბურჭულაძე 5 ოქტომბერს, გამთენიისას დააკავეს.

პაატა ბურჭულაძეს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის ,,ა“ ქვეპუნქტით (სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობა, ჩადენილი ჯგუფურად); 225-ე მუხლის პირველი ნაწილით (ჯგუფური ძალადობის ორგანიზება და ხელმძღვანელობა) და 317-ე მუხლით (მოწოდება საქართველოს კონსტიტუციური წყობილების ძალადობით შეცვლისკენ და სახელმწიფო ხელისუფლების დამხობისკენ) წარედგინა, რაც სასჯელის სახედ და ზომად 9 წლამდე თავისუფლების აღკვეთას ითვალისწინებს.