რთული პირველი ტაიმი - საქართველოს ნაკრები თურქეთთან მარცხდება
2026 წლის მსოფლიო ჩემპიონატის შესარჩევ ეტაპს საქართველოს ნაკრები თურქეთთან დაპირისპირებით იწყებს. სამწუხაროდ, პირველი ტაიმის შემდეგ საქართველო საკუთარ მოედანზე მარცხდება, ანგარიშით 0:2.
მსოფლიო ჩემპიონატის შესარჩევი ჯგუფური ეტაპის პირველ შეხვედრა თბილისში, "დინამო არენაზე“ მიმდინარეობს.
ვილი სანიოლმა შემდეგი შემადგენლობით გაიყვანა საქართველოს ნაკრები მოედანზე:
მამარდაშვილი, კაკაბაძე, კაშია, გოგლიჩიძე, ლოჩოშვილი, წიტაიშვილი, ქოჩორაშვილი, მექვაბიშვილი, დავითაშვილი, კვარაცხელია, მიქაუტაძე
გოლები გაიტანეს: მე- 3 წუთზე მიულდურმა და 41-ე წუთზე აქტიურკოღლუმ
მატჩის დაწყებამდე საქართველოს ნაკრების ფეხბურთელი ნიკა კვეკვესკირი გულშემატკივარს დაემშვიდობა, მან საფეხბურთო კარიერა 33 წლის ასაკში დაასრულა, კვეკვესკირი ნაკრების სამწვრთნელო შტაბის წევრი გახდა.
აშკარაა, რომ თურქეთი მოედანზე მართავდა პროცესს, აკონტროლებდა ბურთს და თამაშის ტემპს. საქართველოს ნაკრებს ჰქონდა ბურთის გატანის რამდენიმე შესაძლებლობა, რაც ვერ გამოიყენეს. აშკარად ძალიან სუსტად გამოიყურება ჩვენი დაცვა, ხოლო ოთარ კიტეიშვილისა და გიორგი ჩაკვეტაძის არ ყოფნაში, მოედანზე უსუსურია ჩვენი შუა რგოლი, შესაბამისად, თავდასხმასთან კავშირი გაწყვეტილია, შედეგად მიქაუტაძემ მთელი ტაიმის განმავლობაში სულ რაღაც 7-ჯერ მიიღო ბურთი.
შეგახსენებთ, საქართველოსა და თურქეთის საფეხბურთო ნაკრებები ბოლოს 2024 წლის ევროპის ჩემპიონატზე დაუპირისპირდნენ. შეხვედრა თურქეთის გამარჯვებით 3:1 დასრულდა.
ცნობისთვის, საკვალიფიკაციო ეტაპზე, საქართველოს ნაკრები E ჯგუფში თურქეთის, ესპანეთის და ბულგარეთის გუნდებს დაუპირისპირდება. მსოფლიო ჩემპიონატის შესარჩევი ეტაპის ფარგლებში, მეორე შეხვედრას საქართველო 7 სექტემბერს, კვლავ "დინამო არენაზე", ბულგარეთის ნაკრების წინააღმდეგ გამართავს.