"ჰგონიათ, გვასამართლებენ, მაგრამ საკუთარი თავისთვის გამოაქვთ განაჩენი - თუ უფლება მაქვს, ბრძოლისკენ მოგიწოდებთ მზია ამაღლობელის სიტყვებით: "იბრძოლეთ, სანამ გვიანი არაა" - გიორგი ახობაძე - პალიტრა ვიდეო

თუ ამის უფლება მაქვს, ბრძოლისკენ მოგიწოდებთ მზია ამაღლობელის სიტყვებით: "იბრძოლეთ სანამ გვიანი არაა". თუ დავაგვიანებთ შედეგი იქნება დრამატული და რთულად გამოსასწორებელი , - ამის შესახებ ნარკოდანაშაულში ბრალდებულმა გიორგი ახობაძემ სასამართლო პროცესზე განაცხადა.

ის ამ წუთებში, სასამართლო პროცესზე საბოლოო სიტყვის უფლებით სარგებლობს, რის შემდეგაც მოსამართლე განაჩენს გამოიტანს.

გიორგი ახობაძეს მოსამართლემ საბოლოო სიტყვა 3-ჯერ შეაწყვეტინა და მიუთითა, რომ "სასამართლოს შეურაცხყოფას ის არ მოისმენდა".

საბოლოო სიტყვის წარმოთქმამდე, ახობაძემ მოსამართლეს მიმართა და უთხრა, რომ გასულ სხდომაზე მის მიერ გაჟღერებული ინფორმაცია იმასთან დაკავშირებით, რომ მას დაცვის უფლება არ შეზღუდვია, მოსამართლის მიერ წინასწარ გამოვლენილი მოსაზრებაა მის საქმეზე.

"აუცილებლად უნდა დავიწყოთ მოტივზე, თუ ერთი წინადადებით აღვწერთ, ეს არის რევანში ჩემს წინააღმდეგ. სხვა ვერაფრით მომერივნენ, ვერც დაშინებით, ვერც ვანდალიზმით, რაც გამოიხატებოდა სხვადასხვა წარწერებით, პლაკატებით, მოიფიქრეს ბანალური და სტანდარტული "ჩადება", ეს შინაგან საქმეთა სამინისტროს სავიზიტო ბარათია ბოლო წლების განმავლობაში...

რევანში ჩართული არიან პოლიციელები, პროკურორი, მოსამართლეები",- განაცხადა ახობაძემ, რა დროსაც მას მოსამართლემ სიტყვა შეაწყვეტინა და უთხრა, რომ "სასამართლო ხელისუფლებასთან დაკავშირებით მსგავსი კონტექსტი ამოეღო".

"მათ [პოლიციელებმა] ჩვენზე კარგად იციან, რომ საკუთარი თავი დაასრულეს, მათ ჰგონიათ, რომ ამ პროცესებზე გვასამართლებენ, მაგრამ საკუთარი თავისთვის გამოაქვთ განაჩენი...

წულუკიანები ჩვენ განაჩენს ვერ გამოგვიტანენ...

თუ ამის უფლება მაქვს, ბრძოლისკენ მოგიწოდებთ მზია ამაღლობელის სიტყვებით, "იბრძოლეთ სანამ გვიანი არაა". თუ დააგვიანებთ შედეგი იქნება დრამატული და რთულად გამოსასწორებელი. ციხით გვაშინებენ, მაგრამ მე გეტყვით, რომ ციხე არაა საშიში. უბრალოდ ჩემი ბრძოლა ამ 20 კვადრატულ მეტრში ვერ ეტევა და ეგაა ჩემი დისკომფორტი. ჩემს თავისუფლებას ვერავინ შემიზღუდავს...

ყველაფერი იწყება ყალბი პატაკით... ფიზიკური ძალადობის ფონზე ჯიბეში "ჩამიდეს" ნარკოტიკი, ამას ესწრებოდა სამმართველოს უფროსი... აღნიშნულ მაღალჩინოსანს კონტაქტი ჰქონდა კიდევ ერთ მაღალჩინოსანთან, ლევან მაისურაძესთან. ჩხრეკისას უკანონოდ მოიპოვეს ჩემი ნერწყვის ნიმუში, რაც ნარკოტიკების შესაფუთ მასალაზე გადაიტანეს. მათ ევალებოდათ ჩხრეკის გადაღება და ნეიტრალური მოწმის მოყვანა, რაც არ გააკეთეს.... რაც ეს ნაგავი ამოიღეს, არც მანქანა გაუჩხრეკავთ, არც სარდაფი... პოლიციელი ვერც ჩემს სახლს, სადარბაზოს, ვერ აღწერდა....

ამტკიცებენ, რომ ნარკოტიკების აქტიური შემძენ-მომხმარებელი ვარ, მე შევთავაზე ფრჩხილის და თმის ტესტი, ვერანაირ მოხმარებას ვერ დამიდასტურებდნენ, რადგან სუფთა ვარ.

მკვლელმა პროკურორმა შმაგი გობეჯიშვილმა და მკვლელმა ლელა მარიდაშვილმა ყველანაირი საფუძვლის გარეშე, დედას ერთადერთი მომვლელი მოწყვიტეს",- განაცხადა ახობაძემ, მას მოსამართლემ კვლავ შეაწყვეტინა სიტყვა.

"სასამართლოზე თქვენი მსგავსი შეფასება არ გავიგო!",- განაცხადა ტყეშელაშვილმა.

"ისინი არიან ისინი, რაც ვთქვი... პროკურორს გამოძიების ობიექტურად და ყოველმხრივი გამოძიება ევალებოდა, რაც არ გააკეთა.

მედავებიან, რომ მასალა ჯიბეში მედო, რაც ნიშნავს, რომ მასზე ანაბეჭდები უნდა ყოფილიყო. პროკურორმა თითის ანაბეჭდზე ექსპერტიზა არ დანიშნა და გაყალბებული დნმ-ის კვალი მოიპოვა.

ნერწყვის ტესტი მომპარეს და დაიტანეს შეფუთვაზე. ცრუ პოლიციელები, მოსამართლე...",- განაცხადა ახობაძემ, მას მოსამართლემ კვლავ შეაწყვეტინა სიტყვა.

"თქვენ რამდენჯერმე მოგცათ სასამართლომ შენიშვნა, საბოლოო სიტყვა არ უნდა შეწყდეს, მაგრამ აქ შეურაცხყოფას არავინ მოისმენს. საბოლოოდ გაფრთხილებთ, ერთ სიტყვასაც კი, რომელიმე მოსამართლეზე დამაკნინებლად, შეურაცხმყოფლად მოვისმენ, თქვენს გარეშე გაგრძელდება სხდომა",- განაცხადა მოსამართლე ტყეშელაშვილმა, რის შემდეგაც ახობაძემ საბოლოო სიტყვით სარგებლობა განაგრძო.

მან დეტალურად გაიხსენა მისი დაკავების ეპიზოდი. როგორც ის აღნიშნავს, მისი დაკავებისას 5 მანქანა და 10-ზე მეტი პოლიციელი იყო.

ამასთან, მისი თქმით, "ჩხრეკა არ გადაიღეს".

"ჩხრეკა არ გადაიღეს და ახლა ცდილობენ დაამტკიცონ, რომ [ნარკოტიკი] მე მეკუთვნოდა... ნივთს რომ ხელი მოკიდო, მასზე დნმ კვალი უნდა დარჩეს, კვალი გაყალბებულია. მასზე ჩემი თითების ანაბეჭდების არსებობა იქნებოდა ობიექტური", - აღნიშნა ახობაძემ.

ცნობისთვის, ცნობისთვის, ექიმი გიორგი ახობაძე 7 დეკემბერს, რუსთაველზე გამართული საპროტესტო აქციიდან სახლში დაბრუნებისას დააკავეს.

მას ბრალი სისხლის სამართლის კოდექსის 260-ე მუხლის მე-6 ნაწილით წარედგინა, რაც დიდი ოდენობით ნარკოტიკული საშუალებების უკანანო შეძენა-შენახვას გულისხმობს.

აღნიშნული დანაშაული 8-დან 20-წლამდე ან უვადო თავისუფლების აღკვეთას ითვალისწინებს.