პირი, რომელიც ყვარელში, საცხოვრებელი სახლის წინ მჯდომ ცოლ-ქმარს დაეჯახა, ალკოჰოლის ზემოქმედების ქვეშ იმყოფებოდა - რამდენწლიანი პატიმრობა ემუქრება 26 წლის ბრალდებულს?
საქართველოს პროკურატურამ, ყვარლის მუნიციპალიტეტში ავტოსაგზაო შემთხვევის შედეგად ორი პირის გარდაცვალების ფაქტზე ერთ პირს ბრალდება წარუდგინა.
"შინაგან საქმეთა სამინისტროს მიერ ჩატარებული გამოძიებით დადგინდა, რომ 22 აპრილს, ყვარლის მუნიციპალიტეტის სოფელ საბუეში ალკოჰოლის ზემოქმედების ქვეშ მყოფი ბრალდებული გადავიდა საავტომობილო გზიდან და შეეჯახა ორ პირს, რომლებიც მიღებული დაზიანებების შედეგად გარდაიცვალნენ.
სამართალდამცველებმა ბრალდებული შემთხვევიდან მალევე დააკავეს. პროკურატურამ დაკავებულს ბრალდება საქართველოს სისხლის სამართლის კოდექსის 276-ე მუხლის მე-9 ნაწილით (ავტომობილის მოძრაობის წესის დარღვევა, რამაც ორი ადამიანის სიცოცხლის მოსპობა გამოიწვია, ჩადენილი ალკოჰოლის ზემოქმედების ქვეშ) წარუდგინა, რაც სასჯელის სახედ და ზომად 12 წლამდე თავისუფლების აღკვეთას ითვალისწინებს.
პროკურატურა ბრალდებულის მიმართ აღკვეთის ღონისძიების სახით პატიმრობის გამოყენების თაობაზე სასამართლოს კანონით დადგენილ ვადაში მიმართავს" - ნათქვამია პროკრუატურის მიერ გავრცელებულ ინფორმაციაში.
ცნობისთვის, ყვარლის მუნიციპალიტეტში ავარიას ცოლ-ქმრის სიცოცხლე ემსხვერპლა. შემთხვევა სოფელ საბუიში, 22 აპრილს, საღამოს საათებში მოხდა. მათსავე საცხოვრებელი სახლის წინ, ჭიშკართან ისხდნენ 66 წლის მარიკა და 67 წლის ბიჭია ამბროსიშვილები და მეზობლებთან საუბრობდნენ, როცა წყვილს მოულოდნელად მანქანა დაეჯახა. ორივეს სიცოცხლისთვის შეუსაბამო დაზიანებები ჰქონდა და ორივე გარდაიცვალა. დამნაშავე 26 წლის ბიჭია.