28 წლის ბიჭის სასტიკ მკვლელობაში ბრალდებული ძმების განაჩენი ცნობილია
გორის ნაფიც მსაჯულთა სასამართლომ სრულად გაიზიარა პროკურატურის მიერ წარდგენილი მტკიცებულებები და განზრახ მკვლელობაში ბრალდებულები ერთხმად ცნო დამნაშავედ. ამის შესახებ ინფორმაციას პროკურატურა ავრცელებს.
მათივე ცნობით, სასამართლო პროცესზე გამოკვლეული მტკიცებულებებით დადგინდა, რომ 2024 წლის 1 სექტემბერს, ბრალდებულებმა ქარელის რაიონის სოფელ ზღუდერში მეზობელს მრავლობითი დაზიანებები მიაყენეს, რის შედეგადაც დაზარალებული გარდაიცვალა.
„პროკურატურამ სასამართლო პროცესზე წარადგინა მტკიცებულებები, რომელთა ერთობლიობა ბრალდებულების მიერ დანაშაულის ჩადენას ადასტურებდა.
ნაფიცმა მსაჯულებმა ორივე ბრალდებული ჯგუფურად ჩადენილ განზრახ მკვლელობში ერთხმად ცნეს დამნაშავედ. სასამართლომ მათ სასჯელის სახედ და ზომად 16 და 20 წლით თავისუფლების აღკვეთა განუსაზღვრა“,-აღნიშნულია ინფორმაციაში.
უმძიმესი დანაშაული ქარელის მუნიციპალიტეტის სოფელ ზღუდერში 2024 წლის 1-ელ სექტემბერს მოხდა - 28 წლის ნიკა ღვინიაშვილი სასტიკად მოკლეს - იმჟამად გავრცელებული ინფორმაციით, "ახალგაზრდა, სკამზე დააბეს, ხელები შეუკრეს და გაგუდეს".
შსს-მ მალევე, ცხელ კვალზე დააკავა 1968 და 1959 წელს დაბადებული ძმები ემზარ და გუჯა მედოშვილები.
ასევე იხილეთ: რა თქვეს სასამართლოში 27 წლის ბიჭის სასტიკ მკვლელობაში ბრალდებულმა ძმებმა?