"დამარცხება გაყალბების, რომელიც ყველა მხრიდან მზადდება არის მობილიზაცია" - ჩვენი ვალდებულებაა, მივიდეთ არჩევნებზე" - სალომე ზურაბიშვილი მოქალაქეებს ხმების დაცვას მოუწოდებს - პალიტრა ვიდეო

დამარცხება გაყალბების, რომელიც ყველა მხრიდან მზადდება და ჩვენ ამას ძალიან კარგად ვხედავთ, არის მობილიზაცია, ყველას მისვლა არჩევნებზე , - ამის შესახებ საქართველოს პრეზიდენტმა, სალომე ზურაბიშვილმა ბრიფინგზე განაცხადა.

როგორც პრეზიდენტმა, სალომე ზურაბიშვილმა აღნიშნა, „ახლა იწყება ის პერიოდი, როცა ყველანი უნდა მოემზადოთ იმისათვის, რომ ხმები იყოს დაცული“.

„თითოეული ადამიანი, თითოეული მოქალაქე პასუხისმგებელია თავის ხმაზე, რომ მივიდეს [არჩევნებზე]. იმ შემთხვევაში, თუ თქვენი ახლობელი უცხოეთში, ვერ ჩაეწერა, არ ჩაწერეს ან ამოიღეს სიიდან, თქვენ ხართ პასუხისმგებელი იმაზე, რომ თქვენი ხმა დაიცვათ ორმაგად. დაცვისთვის საჭიროა დამკვირვებლები. არსებობს ორგანიზაციები, რომლებიც ატარებენ ტრენინგებს, სადაც უნდა ჩაეწეროთ.

მე მინდა მივმართო ახალგაზრდებს. თქვენ ხართ ჩვენი ქვეყნის მომავალი და თქვენი მომავალი არის ის, რაც წყდება 26 ოქტომბერს. თქვენ დიდი პასუხისმგებლობა გაკისრიათ და თქვენ უთუოდ იქნებით თქვენი ხმების ძალიან კარგი დამცველები. არსებობს ორგანიზაცია, რომელიც კოორდინაციას უწევს სხვადასხვა არასამთავრობოებს ტრენინგებისთვის და დამკვირვებლებისთვის - ეს ორგანიზაცია არის „ჩემი ხმა“. თქვენ ყველამ უნდა იგრძნოთ პასუხისმგებლობა, რასაც ჰქვია დამკვირვებლობა, რაც არის ჩვენი ყველას გამხნევება არჩევნების დღეს.

რაც მთავარია - მობილიზაცია, მისვლა არჩევნებზე. არაერთხელ მითქვამს და ბევრჯერ კიდევ გავიმეორებ, რომ დამარცხება გაყალბების, რომელიც ყველა მხრიდან მზადდება და ჩვენ ამას ძალიან კარგად ვხედავთ, არის მობილიზაცია, ყველას მისვლა არჩევნებზე. ჩვენი, ყველასი ვალდებულებაა, რომ მივიდეთ არჩევნებზე და არცერთი ხმა არ დარჩეს გამოუყენებელი იმისთვის, რომ ეს ქვეყანა დავიცვათ, მისი დამოუკიდებლობა დავიცვათ, დავიცვათ მისი ევროპული მომავალი. ეს ჩვენს ხელშია“, - განაცხადა სალომე ზურაბიშვილმა.