"სახის და თავის არეში დაზიანებები მიაყენა და დაემუქრა შვილების სიცოცხლის მოსპობით..." - ქალზე ძალადობის ბრალდებით სამართალდამცველი დააკავეს - პალიტრა ვიდეო

სპეციალური საგამოძიებო სამსახურის თანამშრომლებმა, ძალადობისა და მუქარის ფაქტზე, შინაგან საქმეთა სამინისტროს დაცვის პოლიციის დეპარტამენტის ინსპექტორი დააკავეს.

სპეციალური საგამოძიებო სამსახურის ცნობით, ბრალდებულმა სამართალდამცველმა 2024 წლის 6 აგვისტოს დუშეთის რაიონის სოფელ ზემო ბულაჩაურში დაზარალებულს სახის და თავის არეში დაზიანებები მიაყენა და დაემუქრა მისი და მისი შვილების სიცოცხლის მოსპობით.

ამასთან, განმარტავენ, რომ სპეციალურმა საგამოძიებო სამსახურმა, დაზარალებული ქალის მომართვის შემდეგ, გადაუდებელი საგამოძიებო მოქმედებები ჩაატარა, რის შემდეგაც 2024 წლის 7 აგვისტოს სამართალდამცველი დაკავებული იქნა ძალადობისა და მუქარის ბრალდებით.

„დანაშაული 3 წლამდე თავისუფლების აღკვეთას ითვალისწინებს. სამართალდამცველს ბრალდება 48 საათში წარედგინება. სპეციალური საგამოძიებო სამსახური საქმეზე აგრძელებს გამოძიებას“, - აღნიშნულია განცხადებაში.