"8 წლის ბიჭი მე-4 სართულის ფანჯრიდან გადმოვარდა და დაიღუპა... ვერასოდეს წარმოვიდგენდი, თუ მსგავსი ტექსტის დაწერა მომიწევდა" - ოჯახს ცხედრის კანადაში გადასასვენებლად დახმარება სჭირდება
კანადიდან საქართველოში ჩამოსული 8 წლის ბავშვი ტრაგიკულად დაიღუპა. ბავშვი დედასთან და პატარა ძმასთან ერთად საქართველოში დასასვენებლად იმყოფებოდა.
"ვერასოდეს წარმოვიდგენდი, თუ მსგავსი ტექსტის დაწერა მომიწევდა. მეგობრებო, ტრაგიკულად გარდაიცვალა ჩემი ცოლის დისშვილი... ბავშვი არის კანადის მოქალაქე და საჭიროა გადასვენებისთვის თანხის შეგროვება.
უმორჩილესად გთხოვთ, ვისაც რისი საშუალება გექნებათ, ეს პატარა ანგელოზი დავუბრუნოთ მშობლებს და მის მიწას. მადლობა უღრმესი ყველას ასეთ მძიმე დროს ჩვენ გვერდში დგომისთვის! და ასევე, თუ ბევრ დროს არ წაგართმევთ, რომ გადააზიაროთ ეს პოსტი. დიდად მადლობელი დაგრჩებით" - ამის შესახებ სოციალურ ქსელში ირაკლი ხვედელიძე წერს.
gofundme.com-ზე (სადაც ბავშვის გადასასვენებლად თანხა გროვდება), გამოქვეყნებული ინფორმაციის თანახმად, 8 წლის კონსტანტინე მე-4 სართულის ფანჯრიდან გადმოვარდა.
"დამძიმებული გულით ვიზიარებთ ჩვენი საყვარელი კონსტანტინეს გარდაცვალების ამბავს. ორშაბათს, 8 ივლისს, 2024 წელს, დედასთან და პატარა ძმასთან ერთად საქართველოში დასვენების დროს, ის მე-4 სართულის ფანჯრიდან გადმოვარდა.. ფაქტმა დიდი შოკი და ტკივილი მოგვაყენა ყველას.
კონსტანტინე გასულ თვეს 8 წლის გახდა. ის იყო ბედნიერი, აქტიური, ნათელი, კეთილი და ნაზი პატარა ბიჭი, რომელსაც ყველა აღმერთებდა. ტკივილი, რომელსაც მისი მშობლები განიცდიან ამ დაკარგვის გამო, აუტანელია.
შვილის ნეშტის საქართველოდან კანადაში გადასასვენებლად, კონსტანტინეს მშობლებს მნიშვნელოვანი ფინანსური დახმარება ესაჭიროებათ. მოდით, გავერთიანდეთ, როგორც საზოგადოება, რათა პატივი მივაგოთ კონსტანტინეს ხსოვნას და შევუმსუბუქოთ ოჯახის ტვირთი.
წინასწარ გიხდით მადლობას სიკეთისა და თანაგრძნობისთვის.
ირინა - მაცასა და ალექსის ოჯახის მეგობარი (კონსტანტინეს მშობლები)." - ნათქვამია გამოქვეყნებულ gofundme.com-ზე ინფორმაციაში.