საუდის არაბეთში, ჰაჯის დროს, სულ მცირე, 1 300 ადამიანი დაიღუპა - პალიტრა ვიდეო

საუდის არაბეთის მთავრობაში აცხადებენ, რომ წელს, ჰაჯის დროს, სულ მცირე, 1 301 ადამიანი დაიღუპა, - ინფორმაციას BBC საუდის არაბეთის ოფიციალურ საინფორმაციო სააგენტო SPA-ზე დაყრდნობით ავრცელებს.

SPA-ის ცნობით, დაღუპულების უმეტესობა ის მომლოცველები არიან, რომლებსაც ჰაჯიზე ყოფნის ოფიციალური ნებართვა არ ჰქონდათ და სიცხეში შორ მანძილზე გადაადგილდებოდნენ.

საუდის არაბეთს აკრიტიკებენ იმის გამო, რომ არასაკმარისად იმოქმედა ჰაჯის უსაფრთხოების უზრუნველსაყოფად, განსაკუთრებით, დაურეგისტრირებელი მომლოცველებისთვის, რომლებსაც არ აქვთ წვდომა ისეთ ობიექტებზე, როგორებიცაა კონდიცირებული კარვები და ჰაჯის ოფიციალური ტრანსპორტი.

საუდის არაბეთის ეროვნული მეტეოროლოგიური ცენტრის ცნობით, მექაში ტემპერატურამ 51.8 გრადუსამდე მიაღწია.

ჰაჯი არის მუსლიმთა ყოველწლიური პილიგრიმობა წმინდა ქალაქ მექაში. საუდის არაბეთის ინფორმაციით, წელს ჰაჯიში მონაწილეობა მიიღო, დაახლოებით, 1.8 მილიონმა ადამიანმა.