"ერთი ბალონი დამაცალეს, ვერაფერი დავინახე... თან ჯოხით, ინვალიდი კაცი ვარ... არაფერი აინტერესებდათ! დავალება იყო, რომ ჩაექოლათ ყველა" - მიხეილ რამიშვილი
პარლამენტის შენობის უკანა შესასვლელთან სამართალდამცველებსა და აქციის მონაწილეებს შორის შეხლა-შემოხლა იყო. სამართალდამცველებმა დემონსტრანტების წინააღმდეგ ე.წ. წიწაკის სპრეი გამოიყენეს.
დაშავებულებს შორის არის ადვოკატი მიხეილ რამიშვილი. ის ამბობს, რომ ე.წ. წიწაკის სპრეის შესხმის შემდეგ სასწრაფო დახმარების ბრიგადის დახმარება დასჭირდა.
"ერთი ბალონი დამაცალეს, ისე, რომ ვერაფერი ვეღარ დავინახე. ახლაც ამ წუთას ვერაფერს ვერ ვხედავ. თან ჯოხით ვდგავარ, ინვალიდი კაცი ვარ. არაფერი აინტერესებდათ, დავალება იყო, რომ ჩაექოლათ ყველა. უნდოდათ, გამოეჩინათ ძალა, რომ ყველაფერზე არიან წამსვლელები. ამ ხნის კაცი ვდგავარ და ყველანაირ პირობას ვქმნი, რომ კანონის დარღვევა არ მოხდეს და კანონის დამცველი რომ კანონს დაარღვევს, ის ყველაფერზე წამსვლელია" - ამბობს რამიშვილი.