"შაურმისთვის განკუთვნილ ღორის ხორცში აღმოჩნდა სალმონელა და ობის სოკოები" - თბილისის რომელ საშაურმეში გამოვლინდა დარღვევა? - პალიტრა ვიდეო

საშაურმე OK-ს, რომელიც თბილისში, წერეთლის გამზირის N22-ში მდებარეობს, საწარმოო პროცესი შეუჩერდა. ამის შესახებ ინფორმაციას სურსათის ეროვნული სააგენტო ავრცელებს.

ლაბორატორიული კვლევის შედეგად, შაურმასა და შაურმისთვის განკუთვნილ შემწვარ ღორის ხორცში აღმოჩნდა პათოგენური მიკროორგანიზმი - სალმონელა, ასევე, პროტეუსის ბაქტერია, კოლიფორმები, აერობული მიკროორგანიზმები და ობის სოკოები.

"სურსათის ეროვნულმა სააგენტომ თბილისის გადამდებ დაავადებათა ეპიდზედამხედველობისა და კონტროლის მუნიციპალური ცენტრიდან მიიღო შეტყობინება სალმონელოზის დადასტურებული შემთხვევის შესახებ. ეპიდანამნეზის თანახმად, პაციენტს საკვებად მიღებული აქვს შაურმა, რომელიც შეიძინა საშაურმე OK-ში (წერეთლის გამზირი 22).

ინფორმაციის მიღებისთანავე, სურსათის ეროვნული სააგენტოს თბილისის საქალაქო სამსახურის უფლებამოსილმა პირებმა საშაურმეში (შპს "მადლი" - საშაურმე OK, ს/კ 404581877) სახელმწიფო კონტროლი - არაგეგმური ინსპექტირება განახორციელეს და აიღეს სურსათის ნიმუშები (შაურმა ღორის ხორცით, შაურმისთვის განკუთვნილი შემწვარი ღორის ხორცი, სალათის ფოთოლი, ქათმის ბარკალი და გაყინული ღორის ხორცი).

ლაბორატორიული კვლევის შედეგად, შაურმასა და შაურმისთვის განკუთვნილ შემწვარ ღორის ხორცში აღმოჩენილია პათოგენური მიკროორგანიზმი - Salmonella, ასევე, Proteus spp (პროტეუსის ბაქტერია), კოლიფორმები, აერობული მიკროორგანიზმები და ობის სოკოები.

შპს "მადლს" კრიტიკული შეუსაბამობების გამო შეუჩერდა საწარმოო პროცესი და დაჯარიმდა კანონმდებლობის შესაბამისად; ასევე დაევალა გენერალური რეცხვა-დეზინფექციის ჩატარება, ინვენტარის ზედაპირებიდან ნიმუშების აღება და მომსახურე პერსონალის ჯანმრთელობის მდგომარეობის გამოკვლევა" - ნათქვამია სურსათის ეროვნული სააგენტოს ინფორმაციაში.