ვინ იყო ქალი, რომელიც ბათუმში ტრაგიკულად დაიღუპა - "კლინიკაში ბავშვისთვის რძე მიჰქონდა და მანქანა დაეჯახა, 3 შვილი დარჩა"
ბათუმში ავტოსაგზაო შემთხვევის შედეგად ორი ადამიანი გარდაიცვალა. ორივე შემთხვევა ფრიდონ ხალვაშის ქუჩაზე მოხდა. ადგილობრივების ინფორმაციით, 40 წლამდე ქალი კლინიკა “მედინას" მიმდებარედ ცენტრალურ საავტომობილო გზაზე ქვეითად იმყოფებოდა. გარდაცვლილი დარინა ბოლქვაძეა. შეჯახების შედეგად იგი ადგილზე დაიღუპა. გარდაცვლილს 3 შვილი დარჩა.
"დაღუპულ ქალს კლინიკა მედინაში ჩვილი ბავშვი ჰყავდა მოთავსებული. მისთვის რძე მიჰქონდა და სამწუხაროდ, ასეთი უბედურება დაატყდა თავს. შეეჯახა მანქანა და ადგილზე დაიღუპა ქალი. კლინიკაში მიიყვანეს, თუმცა უკვე გარდაცვლილი იყო" - აცხადებენ ადგილობრივები.
მეორე ავტოსაგზაო შემთხვევაც ამავე ქუჩაზე მოხდა, შუახნის მამაკაცს მსუბუქი ავტომობილი შეეჯახა, მამაკაცი ადგილზე დაიღუპა. მომხდარის გამო შინაგან საქმეთა სამინისტრო გამოძიებას აწარმოებს.