ვინ არის დარეჯან დვალი, რომლის გამოც, "ტვ პირველის" ინფორმაციით, კეკელიძის ქუჩაზე ხუთსულიანი ოჯახი უსახლკაროდ დარჩა და რას ჰყვება სკანდალური მევახშე
დღეს, 23 იანვარს, აღსრულების პოლიციამ თბილისში, კეკელიძის N1-ში მდებარე ბინიდან ხუთსულიანი ოჯახი გამოასახლა. ოჯახის წევრებთან ერთად ბინაში შეკრებილ ადამიანებს, რომლებიც გამოსახლების პროცესის გასაპროტესტებლად იმყოფებოდნენ, პოლიციამ ჯერ სივრცის დატოვებისკენ მოუწოდა, შემდეგ კი ისინი ტერიტორიიდან ძალის გამოყენებით გაიყვანა.
"ტვ პირველის" ინფორმაციით გაირკვა, რომ 68 წლის მევახშე დარეჯან დვალი ფლობს უამრავ უძრავ ქონებას და მის ანგარიშზეა 6 ბინა, 7 მიწის ნაკვეთი და სხვა.
ბინის ყოფილი მფლობელის, მარინა ხატიაშვილის ოჯახის წევრების თქმით, დარეჯან დვალი მუდმივად სხვისი ქონების მიტაცებითაა დაკავებული და ასევე, ჰყავს მაღალჩინოსანი მფარველები, რადგან ის და მისი ოჯახის წევრები აქტიურად არიან ჩართული მევახშეობაში, "მხოლოდ იმით არიან დაკავებულნი, რომ სხვადასხვა პირის ქონება მიიტაცონ და ისინი ქუჩაში დატოვონ ისევე, როგორც ჩვენ, ხუთსულიანი ოჯახი დაგვტოვა".
"დარეჯან დვალი არავინ იცის, ვინ არის, ალბათ, ვიღაც პარლამენტარის ან ვიღაც ბიზნესმენის ფულს ატრიალებს. ჩვეულებრივი კალოშებიანი ქალია, რომელიც ასე გამწარებული ხალხის ბინებით ნაშოვნი ფულით ჭამს საჭმელს მთელი ცხოვრება. მას ოჯახის სამი წევრი მევახშე ჰყავს. აღსრულების ფურცლით 43 600 დოლარი იყო გადასახდელი და მაშინ რომ გადაგვეხადა, ბინას დავიბრუნებდით, მაგრამ გაიწელა სიტუაცია, მაშინ ვერ გადავიხადეთ. აუქციონზე გაიტანა და თვითონ მოიგო ეს ბინა. მას შემდეგ თითქმის 2-ჯერ მეტს, 70 ათას დოლარს ვთავაზობთ, მაგრამ უარზეა, გუშინ და დღეს დილამდე მევახშე დვალი 130 ათას დოლარს ითხოვდა“, - ამბობს ხატიაშვილის ოჯახის წევრი.
AMBEBI.GE დარეჯან დვალს დაუკავშირდა, რომელმაც ყველა ბრალდება უარყო და ისიც, რომ მფარველები ჰყავს. როგორც მევახშე გვარწმუნებს, მაღალჩინოსანი კი არა, ქვეყანაში კანონია მისი მფარველი.
"ცუდად ვარ, ვწევარ, აწეული მაქვს შაქარი და წნევა. ეს არ არის კარგი საქმე და მე ცუდად ვარ... რა ბრალდებებიც გაისმა, ყველაფერი ტყუილია. ვინც ჩემზე რაღაცებს ლაპარაკობს, უთხარით, სიცრუეს თავი დაანებონ. ქონებას მითვლიან, 6 სახლიო, 7 მიწის ნაკვეთიო და ვაიმე, დედა, რა ვქნა, 6 დედმამიშვილიც მყავს და ვერ გავწყვეტ ვერც მათ და ვერც მათ შვილებს?! ყველას მე ვპატრონობ და ძალიან ბევრი გაჭირვებული მყავს - რძალმა შვილები მიატოვა, რომლებიც მე უნდა გავზარდო, ვუპატრონო და ამის გარდა, გაჭირვებული კიდევ მილიონი მყავს. ვინ მაღალჩინოსანი მმფარველობს, ვუი, ვუი, დამანებეთ თავი, არ გამაცინოთ, კანონია ჩვენი მფარველი! ცუდად ვარ და ისე ნუ იზამთ, უარესად გავხდე" - ამბობს დარეჯან დვალი.
სტატიის ვრცლად სანახავად გადადით ლინკზე: https://www.ambebi.ge/article/304871-turme-konebas-mitvlian-6-saxlio-7-micis-nakve/?fbclid=IwAR0XnGK2VYLlfcfrhjpbSpkdUFYIafZVUhL9iQR46-3pNrqu9Fhu-d-qpgk