"საქართველოში დავიბადე, მაგრამ ხაჭაპური რუსეთში უფრო გემრიელია" - ვინ არის საქართველოში დაბადებული სომეხი მებრძოლი, რომლის ვიდეოც სკანდალად იქცა
ქართულ სპორტულ "ფეისბუქ" ჯგუფებსა და გვერდებზე დღეს მთელი დღეა საქართველოში დაბადებული სომეხი სპორტსმენისა და რუსეთის დიდად მყვარებლის, არმან ცარუკიანის ვიდეო ვრცელდება, სადაც ის ამბობს, რომ რუსეთში უფრო გემრიელი ხაჭაპური მზადდება, ვიდრე საქართველოში.
"მე საქართველოში დავიბადე, მაგრამ ხაჭაპური რუსეთში უფრო გემრიელია, ვიდრე საქართველოში“, - ამბობს UFC-ის 27 წლის მებრძოლი.როგორც მოსალოდნელი იყო, ქართველ გულშემატკივრებში ამ ვიდეომ უარყოფითი რეაქციები და გამოხმაურებები გამოიწვია.
არმანი 1996 წელს საქართველოში, ახალქალაქში დაიბადა. ჭიდაობასაც პირველად საქართველოში ეზიარა და იმის შემდეგ სპორტისთვის თავი არ დაუნებებია. მიუხედავად იმისა, რომ ცარუკიანი საქართველოში დაიბადა, ხოლო რუსეთში გაიზარდა, ოქტაგონზე სომხეთის დროშით გამოდის, თუმცა მას სომხეთის მოქალაქეობა არ აქვს.
ცარუკიანი რუსეთის სამ საუკეთესო ქალაქად მოსკოვს, პეტერბურგსა და სოჭს ასახელებს.
"ზღვა, მთები, სპორტული მოედნები. მე ხომ სპორტსმენი ვარ?! ამიტომაც ამ გადმოსახედიდან ვაფასებ. იქ საბრძოლო ხელოვნებების დიდი ცენტრი გახსნეს. მიყვარს სანაპიროზე სირბილი, კვადროციკლით სეირნობა და სნოუბორდით სრიალი“, - აღნიშნავს მებრძოლი.
ამჟამად ცარუკიანი მსოფლიოს საუკეთესო ორგანიზაციაში, UFC-ში იბრძვის. ის მსუბუქი წონის რეიტინგის მეოთხე ნომერია. 14 აპრილს UFC 300-ზე ის ლეგენდარულ ბრაზილიელს, ჩარლზ ოლივერიას დაუპირისპირდება. გამარჯვების შემთხვევაში კი ტიტულისთვის იბრძოლებს.