"ფაქტობრივად, ვეღარ მოძრაობს, ჭრილობა გაუარესებულია და ტკივილები მომატებული… ახლა, როცა დადგა დრო, რომ დაიწყონ მოქმედება, ხელს არავინ ჰკიდებს" - რა ინფორმაციას ავრცელებს დათი ქოქრაშვილის დედა?
"ამერიკაში ვართ უკვე მეექვსე თვეა... შევხვდით სხვადასხვა პროფილის უამრავ ექიმს... ახლა, როცა უკვე დადგა დრო, რომ დაიწყონ მოქმედება, ყველა თავს არიდებს, არავინ ჰკიდებს ხელს… ისინიც კი, ვინც უამრავ რამეს გვპირდებოდა თავიდან. ახლა ამბობენ, რომ შეიძლება უფრო დაუმძიმდეთ მდგომარეობა და ამიტომ თავს არიდებენ ქირურგიულ ჩარევას… უდიდესი რისკია იმის, რომ შარდის ბუშტიც დავკარგოთ და იქაც სტომის გამოტანა დასჭირდეს მერე" - ამის შესახებ დათი ქოქრაშვილის დედა ქრისტინე მამუკაშვილი სოციალურ ქსელში წერს.
მისი თქმით, დათი, ფაქტობრივად, ვეღარ მოძრაობს, ჭრილობა გაუარესებული და ტკივილები მომატებული აქვს.
"დიდი ხანია თქვენთან სიახლეებით არ გამოვჩენილვართ… როგორც იცით, ამერიკაში ვართ უკვე მეექვსე თვეა. აქტიურად დავდივართ ვარჯიშებზე, ექიმებთან, სკოლაში… შევხვდით სხვადასხვა პროფილის უამრავ ექიმს... პლასტიკურ და მიკროქირურგებს… თვითონვე გვეუბნებოდნენ, რომ ეს ძალიან უნიკალური შემთხვევაა და მხოლოდ ტოპ-ექიმებისთვის უნდა მიგვენდო ჩვენი შვილი…
თავიდან გეგმა იყო ასეთი, რომ ყველა კვლევის და ყველა პროფილის ექიმთან ვიზიტის შემდეგ დათის ჩაუტარდებოდა რეკონსტრუქციული პლასტიკური ოპერაცია 4 ეტაპად, შემდეგ ჩაუბრუნებდნენ ნაწლავს და ბოლოს დაუხურავდნენ ტრაქეას. ჩავიტარეთ ყველანაირი კვლევა და ვიყავით ყველა ექიმთან, სადაც კი შეიძლებოდა…
ახლა, როცა უკვე დადგა დრო, რომ დაიწყონ მოქმედება, ყველა თავს არიდებს, არავინ ჰკიდებს ხელს… ისინიც კი, ვინც უამრავ რამეს გვპირდებოდა თავიდან. ახლა ამბობენ, რომ შეიძლება უფრო დაუმძიმდეთ მდგომარეობა და ამიტომ თავს არიდებენ ქირურგიულ ჩარევას… უდიდესი რისკია იმის, რომ შარდის ბუშტიც დავკარგოთ და იქაც სტომის გამოტანა დასჭირდეს მერე…
იმას ყველა აღიარებს, რომ ასე დატოვებაც არ შეიძლება, თუმცა ხელს არავინ ჰკიდებს… ერთ-ერთმა ბოდიშიც კი მოგვიხადა, სამწუხაროდ, გამოდის, რომ თქვენი დრო გავფლანგეთო…
გაფლანგული 6 თვის შემდეგ ჩვენი მდგომარეობა ასეთია: გვაქვს საშინლად დეფორმირებული ხერხემალი, კიდევ უფრო მომატებული წონა, დამძიმებული ფსიქიკა, ბევრად უფრო მოდუნებულია და ფაქტობრივად, ვეღარ მოძრაობს, ჭრილობა გაუარესებულია და ტკივილები მომატებული…
ამ ვიდეოში უკეთებენ ხერხემლის დამჭერ კორსეტს და ფეხზე ვერ დადგა, რომ ზომები აეღოთ. ღმერთს ვთხოვ, რომ რამე გზა გამოგვიჩინოს და მოგვცეს ძალა მე და ირაკლის, რომ ბავშვი ბოლომდე ფეხზე დაგვაყენებინოს. სამწუხაროდ, აღარ ვიცი, სხვა რა შეიძლება გავუკეთოთ და სად შეიძლება წავიყვანოთ… ბოლოს ერთ-ერთმა ე.წ. ტოპ-ექიმმა ისიც კი გვითხრა, როდემდე უნდა იაროთ ასე, დაუბრუნდით თქვენს ძველ ცხოვრებასო… რანაირად??? ასე ხომ არ დავტოვებთ ბავშვს… დაშლილს…" - წერს დათი ქოქრაშვილის დედა ქრისტინე მამუკაშვილი სოციალურ ქსელში და ვიდეოს აქვეყნებს.