"მკვლელს სხვაში შეეშალა, ზურგიდან მიეპარა, დანა ჩაარტყა და ადგილზე მოკლა! რაც ამ ტრაგედიის შესახებ გავიგე, სულ ვფიქრობ, რა შემიძლია გავაკეთო" - ნიდერლანდებში მოკლული შოთა საკანდელიას დედის მეგობარი მიმართვას ავრცელებს - პალიტრა ვიდეო

ნიდერლანდებში მოკლული 32 წლის შოთა საკანდელიას დედის მეგობარი მანანა გაგუა სოციალურ ქსელში მიმართვას ავრცელებს.

"გრძლად უნდა დავწერო, ბოდიშს ვიხდი, მაგრამ გთხოვთ, ბოლომდე წაიკითხოთ.

დაახლოებით ერთი თვის წინ მეგობრის შვილი მოკლეს ნიდერლანდებში. მკვლელს სხვაში შეეშალა, ზურგიდან მიეპარა, დანა ჩაარტყა და ადგილზე მოკლა. რა თქმა უნდა, გაიქცა, დღესაც მიმალვაშია და ინტერპოლი ეძებს.

ახლა ჩემი მეგობრის სტატუსი ვნახე, მოვკვდი, რომ ვკითხულობდი. ძალიან მძიმე და ემოციურია. არც ვიცოდი, გამეზიარებინა თუ არა. იმ წამიდან, რაც ამ სრულიად წარმოუდგენელი ტრაგედიის შესახებ გავიგე, სულ ვფიქრობ, რა შემიძლია გავაკეთო, რით შემიძლია ოჯახს გვერდში ამოვუდგე, რომ რაღაცაში მაინც დავეხმარო, მაგრამ მართალი გითხრათ, ვერაფერი მოვიფიქრე. საჭირო სიტყვებსაც ვერ ვპოულობ. ერთი პერიოდი ვიფიქრე, ანგარიშს გავხსნი, ვისაც როგორ შეუძლია, დაეხმაროს-მეთქი, მაგრამ ამისიც მერიდება. ვცადე, დავკავშირებოდი ორგანიზაციებს, რომლებიც იურიდიული მომსახურებით ან თუნდაც რჩევით მიეშველებოდნენ, მაგრამ ერთი-ორი ადამიანის გარდა (დიდი მადლობა მათ) არავის მოუკლავს თავი.

ოჯახი სამართალს ეძებს. უნდათ, რომ დამნაშავე იპოვონ და სათანადოდ დაისაჯოს, მაგრამ მთელი უბედურება იმაშია, რომ ურჩიეს, საქართველოში ადვოკატის დაქირავებას აზრი არა აქვს, ნიდერლანდებში უნდა გააკეთოთ ესო. წარმოიდგინეთ, რამდენ სირთულესთანაა ეს დაკავშირებული, თანხებთან, კონტაქტებთან, ენის ბარიერთან. ოჯახი მარტვილში ცხოვრობს.

ვაცნობიერებ, რომ მძიმე სიტუაციაა, მაგრამ არ მინდა, დავიჯერო, რომ დამნაშავის მონახვა შეუძლებელია. ასე უნდა შერჩეს ეს დანაშაული და გააგრძელოს ცხოვრება? ჩემს შვილს რომ გაეკეთებინა ეს, თვალს არ დავახამხამებდი, ჩემი ხელით მივიყვანდი პოლიციაში. მამამისი კი სახლს ყიდის თურმე, ჩემს შვილს უნდა დავეხმაროო. მწერალია, სხვათა შორის, ვინ იცის, რა გულისამაჩუყებელ წიგნებს წერს.

არც ვიცი, რატომ ვწერ ამ სტატუსს, რას ველი. ამ ეტაპზე, რაც ყველაზე მეტად სჭირდებათ, ესაა იურისტი ნიდერლანდებში, სავარაუდოდ, ქართველი.

ბევრი ფრენდი მყავხართ, ჟურნალისტი, იურისტი, პოლიტიკოსი, აქტივისტი... იქნებ ვინმემ რაიმე ურჩიოთ ოჯახს, ან გააზიაროთ მისი (ან ჩემი) სტატუსი, იქნებ რაიმე გზა გამოჩნდეს მათ დასახმარებლად.

Sandra Roelofs/სანდრა რულოვსი" - ნათქვამია მანანა გაგუას მიმართვაში.