"ძალიან ცუდ დღეში ვართ, საშინელებაა" - რა ხდება თემქაზე და რას აპროტესტებენ ადგილობრივები?
ჩავარდნილი და დაზიანებული საავტომობილო გზა თემქაზე უკვე რამდენიმე თვეა, რაც მოსახლეობის უკმაყოფილებას იწვევს.
ადგილობრივების ინფორმაციით, თემქის ხევი ერთ-ერთი ცენტრალური გზაა, რომელიც ბოლო 6 თვის განმავლობაში მეორედ ჩამოინგრა.
„3 კვირაა ეს გზა კეთდება, ახლა დაიწყო და გვიხარია. ცუდ დღეში ვართ ძალიან, გვიჭირს ფეხით სიარულიც. მთავარია სწრაფად და ხარისხიანად გაკეთდეს“, -ამბობენ თემქაზე მცხოვრები ადგილობრივები.
დაზიანებული მონაკვეთის გამო, თვეებია საზოგადოებრივი ტრანსპორტიც კი შემოვლითი გზებით დადის, ეს კი ვიწრო ქუჩებზე დაუსრულებელ საცობებს ქმნის.
როგორც ერთ-ერთი მოქალაქე ამბობს, გზის სარემონტო სამუშაოები ნელი ტემპით მიმდინარეობს. “ერთხელ გააკეთდა და ჩაინგრა, ახლაც მუშები ნელა მუშაობენ. ავტობუსები არ დადიან, სამსახურსა და სკოლებში ვაგვიანებთ და დავდივართ ვიწყო გზებზე“.
გლდანი-ნაძალადევის გამგეობის მიერ გავრცელებული ინფორმაციით- გზა 20 ნოემბერს გაიხსნება, მას შემდეგ რაც დასრულდება საყრდენი კედლის მოწყობა.
გზის მეორედ ჩაშლის მიზეზად კი წყლის მიწისქვეშა კომუნიკაციების დაზიანება სახელდება.