როგორ უნდა ჩაერთოთ კამპანიაში - „ჩვენი ხმა ევროპას“ და რომელ ვებმისამართზე შეგიძლიათ ელექტრონული ხელმოწერა - ყველაფერი კამპანიის შესახებ - პალიტრა ვიდეო

საქართველოს პრეზიდენტის, სალომე ზურაბიშვილის ინიციატივით, ხელმოწერების კამპანია - „ჩვენი ხმა ევროპას“ დაიწყო.

ხელმოწერა საქართველოს ყველა მოქალაქეს, მათ შორის, ემიგრანტებსაც შეუძლიათ, როგორც ინტერნეტის საშუალებით, ასევე პრეზიდენტის სასახლეში მისვლით და დოკუმენტზე ხელმოწერით.

ონლაინ, ხელმოწერა შეგიძლიათ პრეზიდენტის ოფიციალურ ვებგვერდზე: https://president.ge/index.php?m=256&lng=geo&fbclid=IwAR1Zb_ARBQAJZQN_rQPHIp-lECiaOT3nRqsGCjq8HkdzwHxuVRM8qUso3KU

პრეზიდენტმა ორბელიანების სასახლესთან შეკრებილებს ევროპის მიმართვის ტექსტი გააცნო და ხელი მოაწერა.

„მინდა, წაგიკითხოთ ჩვენი მიმართვა და შემდეგ მე მოვაწერ ხელს პირველი, როგორც ამ ქვეყნის პრეზიდენტი, ხელმოწერებისთვის გახსნილი იქნება.

ჩვენ, საქართველოს მოქალაქეები, მოგმართავთ თქვენ, ევროპის ლიდერებს, დეკემბრის ისტორიულ გადაწყვეტილებამდე გვსურს მოგაწვდინოთ ჩვენი ხალხის ერთობლივი ხმა და დაგანახოთ ჩვენი ერთობლივი სულისკვეთება.

მოგმართავთ, მიანიჭოთ ჩვენს ქვეყანას კანდიდატის სტატუსი, თანახმად, საქართველოს და მისი ხალხის მრავალწლიანი მიზანმიმართული სწრაფვისა და ურყევი ნებისა. საქართველოს ხალხის გამოხატული ნება ვერ შეარყია ვერცერთმა ურთულესმა გამოწვევამ, ვერც ომმა და ვერც ოკუპაციამ. ჩვენი წარსულით და საერთო ღირებულებებით დიდი ხანია ერთნი ვართ, მაშასადამე, ჩვენი მომავალი თქვენთან არის, ევროპაშია და ამას ალტერნატივა არ გააჩნია.

საქართველოს კონსტიტუციაში ჩაწერილი პირობის თანახმად, ძალისხმევას არ დავიშურებთ და არაფერს დავაკლებთ ჩვენს მიზანს, სხვადასხვა პოლიტიკური მსოფლმხედველობის მიუხედავად, ერთობის ძალით, ხელს ვაწერთ ამ პეტიციას და ვითხოვთ კანდიდატის სტატუსს“, - ნათქვამია ტექსტში, რომელსაც პრეზიდენტმა მოაწერა ხელი.