რა სიახლეებია დაგეგმილი 2024 წლისთვის? - პრემიერმა მთავრობის სხდომაზე ბიუჯეტის პროექტის გადამუშავებულ ვარიანტზე ისაუბრა
ბიუჯეტი კონსერვატიულად არის დაგეგმილი, 5%-იანი ეკონომიკური ზრდა გვაქვს გათვალისწინებული 2024 წელს, - ამის შესახებ პრემიერ-მინისტრმა ირაკლი ღარიბაშვილმა მთავრობის სხდომის დაწყებამდე განაცხადა.
მისი თქმით, 2024 წელს მთელი ქვეყნის ეკონომიკა 85 მილიარდ 370 მილიონი ლარი იქნება.
"დღეს ჩვენ შევიკრიბეთ იმისთვის, რომ პარლამენტს გადავუგზავნოთ ბიუჯეტის პროექტის გადამუშავებული ვარიანტი. მოგეხსენებათ, რომ ჩვენ ბიუჯეტის პირველად ვარიანტზე საკმაოდ ინტენსიურად ვიმუშავეთ. ამის შემდეგ ჩვენ პარლამენტს წარვუდგინეთ სექტემბრის ბოლოს პირველი ვარიანტი და მთელი ამ პერიოდის განმავლობაში გავაგრძელეთ მუშაობა თითოეულ სამინისტროსთან. მერე, ასევე, გვქონდა სამუშაო შეხვედრა პარლამენტთან, უმრავლესობასთან, კომიტეტებთან, ყველასთან დეტალურად გავიარეთ ბიუჯეტის პირველი ვარიანტი. შემდეგ ვიმუშავეთ და ახლა წარმოვადგენთ მეორე ვარიანტს", - აღნიშნა პრემიერმა.