"არ იქნება დისციპლინა, არ იქნება ხარისხი; არ უნდა მიუშვა, თუ არ გიჭირავს მაგრად, დაგეფანტება ყველაფერი; ეს ძველი დროიდანაც მოდის და მეც გავამკაცრე კიდევ ბოლო პერიოდში" - რას ამბობდა ნინო სუხიშვილი ანსამბლში არსებულ დისციპლინაზე?
"ან ცეკვავ ისე, როგორც მოვითხოვ, ან საერთოდ არ ცეკვავ, მიდიხარ ჩემგან…“, - ამ სიტყვებს ქართული ნაციონალური ბალეტის ხელმძღვანელი ნინო სუხიშვილი მოცეკვავეებს ეუბნება. ვიდეოს სოციალურ ქსელში ანსამბლის ოფიციალური გვერდი ავრცელებს. აღნიშნულ ვიდეოს სოციალურ ქსელში ნეგატიური გამოხმაურება მოჰყვა. უამრავმა ადამიანმა გააზიარა, რომლებიც წერენ, რომ ანსამბლის ხელმძღვანელი მოცეკვავეებს უყვირის და შეურაცხყოფას აყენებს. თუმცა ყველა ასე არ ფიქრობს და საზოგადოების ნაწილი მიიჩნევს, რომ მსგავსი მიდგომა მისაღებია, რადგან ასე მიიღწევა დისციპლინა, რაც აუცილებელია იმისთვის, რომ ანსამბლს ყოველთვის საუკეთესო შედეგი ჰქონდეს.
ნინო სუხიშვილმა ანსამბლში არსებულ დისციპლინაზე "საზოგადოებრივი მაუწყებლის" ეთერში, გადაცემაში "გორგილაძის აუტანელი სიმსუბუქე" ჯერ კიდევ 2021 წელს ისაუბრა.