რა არის ცნობილი ოთარ ფარცხალაძეზე, რომლის შვილიშვილის ნათლიაც ბერა ივანიშვილია და რას ამბობდა ბიძინა ივანიშვილი მასზე 2016 წელს?
ოთარ ფარცხალაძე, რომელსაც აშშ-მა სანქციები დაუწესა, საქართველოს მთავარ პროკურორად 2013 წლის 7 ნოემბერს დაინიშნა, ამავე წლის 30 დეკემბერს კი გადადგა. 2008 წლამდე მუშაობდა შინაგან საქმეთა სამინისტროში, სხვადასხვა საპასუხისმგებლო თანამდებობებზე, გარდა ამისა, იყო საქართველოს პარლამენტის ენერგეტიკის დროებითი საგამოძიებო კომისიის წევრი.
ოთარ ფარცხალაძის შვილიშვილის ნათლია, ბიძინა ივანიშვილის ვაჟი, ბერაა. ამის შესახებ ბიძინა ივანიშვილმა, 2016 წელს, "ქორთიართ მერიოტში" ეკონომიკური კონფერენციის დასრულების შემდეგ ჟურნალისტებს განუცხადა და აღნიშნა, რომ ფარცხალაძესთან არ მეგობრობს.
"ფარცხალაძეს ხშირად ნამდვილად ვერ ვხვდები, ის ჩემი მეგობარი არაა, როგორც მე ვიცი, ჩემი ბერა გახლავთ მაგის შვილიშვილის ნათლია”- განაცხდა ბიძინა ივანიშვილმა 2016 წელს.
ფარცხალაძე, რომელმაც საქართველოს მთავარ პროკურორად მხოლოდ 47 დღე იმუშავა, არაერთ სკანდალში გაეხვა. ერთ-ერთი სკანდალი მის დიპლომს ეხებოდა, რომლის მიღებაც ამ უკანასკნელმა 19 წლის ასაკში შეძლო; გარდა ამისა, მთავარი პროკურორი ფარცხალაძე ზეწოლაში დაადანაშაულა პატიმრობაში მყოფმა ვანო მერაბიშვილმა. სასჯელაღსრულების სამინისტრომ ეს ფაქტი არ დაადასტურა, ქვეყანამ ბრალდება არ გამოიძია, რის გამოც ადამიანის უფლებათა ევროპულმა სასამართლომ შესაბამისი გადაწყვეტილებაც გამოიტანა საქმეზე “მერაბიშვილი საქართველოს წინააღმდეგ”.
ერთ-ერთი სკანდალი, რომელშიც ფარცხალაძე გაეხვა, უკავშირდებოდა წარსულში მის ნასამართლეობას (გერმანიაში.) ეს ფაქტი საქართველოს ხელისუფლების წარმომადგენლებისთვისაც უსიამოვნო სიურპრიზი აღმოჩნდა. ენმ-ის მიერ გავრცელებული ინფორმაციით, ფარცხალაძე 2000-იანი წლების დასაწყისში გერმანიაში ქურდობის ბრალდებით იყო გასამართლებული, ნასამართლეობის ფაქტი ფარცხალაძემაც დაადასტურა, თუმცა მან თქვა, რომ გერმანიის მართლმსაჯულება არა ქურდობას, არამედ პოლიციისადმი წინააღმდეგობის გაწევას ედავებოდა.
შეგახსენებთ, რომ აშშ-მა საქართველოს ყოფილ მთავარ პროკურორს, ოთარ-ფარცხალაძეს სანქციები დაუწესა. ამის შესახებ ინფორმაციას აშშ-ის სახაზინო დეპარტამენტის უცხოური აქტივების კონტროლის ოფისი ავრცელებს.
მათი ცნობით, ახალი სასანქციო პაკეტის ფარგლებში სანქციები კიდევ 24 ინდივიდზე გავრცელდება, რომელთა შორის ოთარ ფარცხალაძეც არის.
გამოცემა Associated Press-ის ინფორმაციით, აშშ-ის სახელმწიფო დეპარტამენტი ოთარ ფარცხალაძეს ქართველ-რუს ოლიგარქად მოიხსენიებს, რომელთანაც რუსეთის უშიშროების ფედერალური სამსახური (“ეფესბე”) მუშაობდა, რათა რუსეთის სასარგებლოდ გავლენა მოეხდინა ქართულ საზოგადოებასა და პოლიტიკაზე.
Associated Press აშშ-ი წერს, რომ აშშ რუსეთიდან, თურქეთიდან, არაბთა გაერთიანებულ საამიროებიდან და საქართველოდან 150-ზე მეტ ბიზნესსა და ინდივიდს ასანქცირებს, რათა კრემლის ტექნოლოგიებზე, ფულსა და ფინანსურ არხებზე წვდომა აღკვეთოს უკრაინის წინააღმდეგ ომის საწარმოებლად.