"როგორ კადრულობთ, ქალბატონო, ასეთ რამეს? მე თქვენ შეგაგინეთ?!" - ირაკლი ქადაგიშვილი თინა ბოკუჩავას - პალიტრა ვიდეო

ბიუროს სხდომაზე ჩვენ შოვის ტრაგედიის ირგვლივ საგამოძიებო კომისიის საკითხის განხილვა მოვითხოვეთ. ხოლო პასუხი იყო ცინიკური სიცილი ბატონი სარჯველაძისგან, ცინიკური ტაში ქალბატონი ბითაძისგან და პირდაპირი სიტყვებით გინება ბატონი ქადაგიშვილის მხრიდან, - ამის შესახებ ფრაქცია „ნაციონალური მოძრაობის“ თავმჯდომარე თინა ბოკუჩავამ პარლამენტის პლენარულ სხდომაზე სიტყვით გამოსვლისას განაცხადა.

მისი თქმით, ოპოზიციამ მმართველ გუნდს საჯარო დისკუსია შესთავაზა, თუმცა „ქართულმა ოცნებამ“ „კვლავ პროცედურული ომის და დანაშაულის დაფარვის გზა აირჩია“.

„გუშინდელმა ბიუროს სხდომამ კიდევ ერთხელ გამოაჩინა „ოცნების“ რეალური სახე, სადაც ჩვენ საგამოძიებო კომისიის საკითხის განხილვა მოვითხოვეთ შოვის ტრაგედიის ირგვლივ, ხოლო „ოცნების“ პასუხი იყო ცინიკური სიცილი ბატონი სარჯველაძისგან, ცინიკური ტაში ქალბატონი ბითაძისგან და პირდაპირი სიტყვებით გინება ბატონი ქადაგიშვილის მხრიდან. ეს არის თქვენი რეალური სახე და ეს იყო სწორედ თქვენი რეაქციაც შოვის ტრაგედიის შემდეგ უშუალოდ, როდესაც სამარცხვინოდ აგრესიულად, შეურაცხმყოფელად თავს ესხმოდით დაზარალებულებს. ჩვენ შემოგთავაზეთ საჯარო დისკუსია და არა ფორსირებული კენჭისყრა კომისიის ჩაგდების მიზნით, მაგრამ თქვენ, როგორც წარსულში, სხვა საგამოძიებო კომისიების განხილვისას, კვლავ პროცედურული ომის და დანაშაულის ასე დაფარვის გზა აირჩიეთ“, - განაცხადა თინა ბოკუჩავამ.

ბოკუჩავას ამ განცხადებას სხდომათა დარბაზიდან რეპლიკები მოჰყვა. ის საპარლამენტო უმრავლესობის დეპუტატმა ირაკლი ქადაგიშვილმა ტყუილის თქმაში დაადანაშაულა და ოპოზიციონერ კოლეგას მატყუარა უწოდა.

„როგორ კადრულობ, როდესაც ამბობ, რომ თითქოს ბიუროს სხდომაზე შევიგინე“, - აღნიშნა ქადაგიშვილმა.