"მანქანაში მე არ ვყოფილვარ, მის გვერდით ის ქალი იჯდა, რომლის გამოც დავშორდით, ზღვაზე მიდიოდნენ" - რას ამბობს უკრაინაში მოკლული ჯუმბერ სილაგავას ყოფილი ცოლი?
სოციალურ ქსელებში ჩვენ მოვახერხეთ გვერდის პოვნა ნატალია სილაგავას სახელით, სადაც განთავსებულია განცხადებები დნეპრში, პეტრიკოვკასა და პარტიზანსკაში გარდაცვლილთა ძეგლების დამზადებისა და დაკრძალვის ორგანიზების შესახებ.
როგორც ირკვევა, ნატალია სილაგავა გარდაცვლილის ყოფილი ცოლია. მან უკრაინულ მედიას შემდეგი განუცხადა:
"მარტში დავშორდით ერთმანეთს. 17 წლის ვიყავი, მისი მეუღლე რომ გავხდი. ახლა 36 წლის ვარ. მე ამ მანქანაში არ ვყოფილვარ, მის გვერდით ის ქალი იჯდა, რომლის გამოც დავშორდით. ზღვაზე მიდიოდნენ, ნიკოლაევის რეგიონში".
მან ასევე ისაუბრა მათი შვილების ფსიქოლოგიურ მდგომარეობაზე, რომლებიც მამის გარდაცვალებას შეესწრნენ.
"ბავშვებს ძალიან უყვარდათ მამა, არასოდეს გამომიყენებია ისინი მამის წინააღმდეგ, მიუხედავად იმისა, რომ დავშორდით... პოლიციიდან არავინ დამკავშირებია. ამას აზრიც არ აქვს, მათთან საუბარი არ მჭირდება. ქმარს ვერ დავაბრუნებ, ყველაფერი ისე იყოს, როგორც კანონის მიხედვით იქნება. პრეტენზია მაქვს იმ პოლიციელთან, რომელმაც ჩემს შვილს ვიდეო სთხოვა და შემდეგ გამოაქვეყნა ადგილობრივ "ტელეგრამ-არხზე“, - თქვა ქალმა.
უკრაინაში პოლიციელებთან კონფლიქტს 38 წლის ჯუმბერ სილაგავა ემსხვერპლა. შემთხვევის ადგილზე იმყოფებოდნენ სილაგავას პარტნიორი ქალი და ორი მცირეწლოვანი შვილი. სოციალურ ქსელში ვრცელდება შემთხვევის ამსახველი რამდენიმე ვიდეოჩანაწერი, მათ შორის, საპატრულო პოლიციელის სამხრესთან დამაგრებული კამერითა და მანქანაში მყოფი ბავშვის ტელეფონით გადაღებული. განაგრძეთ კითხვა