“პოსტი ეხება სიღნაღს; მსგავსი შეურაცხყოფა და დაცინვა მეტი რა უნდა იყოს?!“ - მოქალაქე საგანგაშო კადრებს ავრცელებს
“ცოტა სასაცილო კია არსებულ მძიმე ვითარებაში მსგავსი პოსტების წერა, მაგრამ რაც უფრო მეტი ხალხი გაიგებს ჩვენი გადასახადებით დაფინანსებული მერიების და შესაბამისი სამთავრობო დაწესებულებების მუქთახორობას და უბრალოდ თანხების ბოროტად გამოყენებას, უკეთესი მგონია ამ ქვეყნის მომავლისთვის, იქნებ არჩევნებზე მეტი ხალხი დაფიქრდეს ხმის მიცემის დროს.
ეს პოსტი ეხება ქიზიყის რეგიონს, კერძოდ, სიღნაღს. ეჭვი მეპარება, ამაზე მეტად ტურისტულად მნიშვნელოვანი ადგილი არსებობდეს კახეთში და გთხოვთ, უყუროთ ვიდეოს, რა ვითარებაა სიღნაღის გალავნის ერთ-ერთ კოშკში. მსგავსი და უარესი ვითარებაა სამივე კოშკში, რაც ვნახე. არ ვარ ნიჭიერი ვიდეოების გადაღებაში ნამდვილად, მაგრამ დაახლოებით მიხვდებით, რაც ხდება. ადგილზე არის გაცილებით უფრო სერიოზული და საშიში მდგომარეობა. სიბინძურეს და შარდის სუნით აყროლებულ ადგილებს რომ თავი გავანებოთ, უბრალოდ სიცოცხლეს რისკავ ადამიანი ზედ ასვლით, ყოველ ჯერზე. დაბლა გავიგონე, ტურისტი როგორ ამბობდა, ძაან მინდოდა ასვლა, მაგრამ ცოლმა არ გამიშვა, შეეშინდა, რომ ჩამოვვარდებოდიო. ყველა კარგად იყოს და მერე რამე რომ მოხდეს, ყველაზე უკეთეს შემთხვევაში ფეხი მოიტეხოს ადამიანმა, ალბათ უბრალოდ აკრძალავენ შიგნით შესვლას, არადა, უმარტივესად და უიაფესად არის შესაძლებელი პრობლემის მოგვარება.
თავგამოდებული და სიამაყით რომ წაიყვან შენს უცხოელ მეგობარს აუღებელი ციხესიმაგრის სანახავად, ჰყვები ისტორიებს წარსულიდან და უცებ აქ შეგვყავს ადამიანი, არ ვიცი, მსგავსი შეურაცხყოფა და დაცინვა მეტი რა უნდა იყოს. ალბათ, პირველ რიგში, სიღნაღის მერიასა და დასუფთავების სამსახურს მოეთხოვება პასუხი. როგორც გავიგე, ორ წელზე მეტია ასეთი მდგომარეობაა და ნორმალური გგონიათ ეს ყველაფერი? რა ხდება, რა ვერ გამონახეთ სახსრები და დრო ამ პრობლემის მოსაგვარებლად? ნორმალურია, ადრე რომ სათოფურებიდან ხალხი მტერს ესროდა იარაღს და იცავდა ტერიტორიას, ახლა პლასტმასის ბოთლებით იყოს ამოტენილი და შეუძლებელი იყოს გახედვა?
ნუ, მოდი, იმაზე აღარ მოვყვები საერთოდ, რუსი გიდები რომ ატარებენ ტურებს, ჰყვებიან საერთოდ სხვა სამარცხვინო და რეალობისგან დაშორებულ ისტორიებს და აჭრელებულია ქალაქი რუსული წარწერებით. ფაქტობრივად, ოკუპირებულია გალავანშემორტყმული ქალაქი და ყველა თავს იშტერებს, გეგონება არაფერი ხდება. გამიხარდება, თუ დამეხმარებით ვიდეოს გავრცელებაში.“ - წერს ნინო ჯავაშვილი და ვიდეოს ავრცელებს.