"კეზერა მოგვიკითხე!" - თბილისის საკრებულოს სხდომა "ნაციონალურმა მოძრაობამ" პროტესტის ნიშნად დატოვა
თბილისის საკრებულოს სხდომა, სადაც დედაქალაქში დაგეგმილი სამშენებლო პროექტების მიზნობრიობა განიხილება, “ნაციონალურმა მოძრაობამ” პროტესტის ნიშნად დატოვა.
სხდომაზე “ნაციონალური მოძრაობის” წევრმა ირაკლი ნადირაძემ განაცხადა, რომ ის სამშენებლო პროექტები, რომელთა გაშენებაც იგეგმება, დედაქალაქისთვის ზიანის მომტანია, ხოლო იმის ნაცვლად, რომ თბილისის მერმა კახა კალაძემ რეალურად იზრუნოს თბილისელების პრობლემებზე, ზრუნავს “ქართული ოცნების” დეპუტატების, მათ შორის, ნინო წილოსანის პრობლემის მოგვარებაზე.
ნადირაძის განცხადებას “ქართული ოცნების” მხრიდან ირონია და ტაში მოჰყვა.
“ხუთიანი, ხუთიანი! კეზერა მოგვიკითხე!” - მიმართეს ნადირაძეს “ქართული ოცნების” საკრებულოს წევრებმა.
“არსებობს გლობალური ომის პარტია, რომელსაც არ უნდა მშვიდობა”, - განაცხადა „ქართული ოცნების” წევრმა ზურაბ აბაშიძემ.
თავის მხრივ, საკრებულოს თავმჯდომარე გიორგი ტყემალაძემ ირაკლი ნადირაძის აღნიშნულ განცხადებას დემაგოგია უწოდა.