მსახიობი გოგი ხარაბაძე გარდაიცვალა
მსახიობი და რეჟისორი გოგი ხარაბაძე 81 წლის ასაკში გარდაიცვალა. ინფორმაციას სოციალურ ქსელში რუსთაველის თეატრი ავრცელებს.
“რუსთაველის ეროვნული თეატრისთვის უდიდესი ტკივილია საქართველოს სახალხო არტისტის გოგი ხარაბაძის გარდაცვალება!”, - ნათქვამია ინფორმაციაში.
გოგი ხარაბაძეს მიღებული აქვს საქართველოს დამსახურებული არტისტისა და საქართველოს სახალხო არტისტი წოდება. იყო შოთა რუსთაველის სახელობის სახელმწიფო პრემიის ლაურეატი.
"დღეს ძმები ახლიდან მომიკვდნენ! გოგი გარდაცვლილა ხარაბაძე... თამაზის სიკვდილის მერე ისე არავინ დამდგომია გვერდში, როგორც ეს გოგიმ გააკეთა. დღეს მე მესამე ძმა მომიკვდა... ცრემლები მახრჩობს... რა ძნელი ყოფილა მწუხარების ფურცელზე გადატანა... სიტყვები არ მყოფნის... ნახვამდის ჩემო ძმაო, იქ შეხვედრამდე..." - წერს სოციალურ ქსელში ცნობილი ქართველი მწერლების ოთარ და თამაზ ჭილაძეების და თინა ჭილაძე.
გოგი ხარაბაძე 1942 წლის 12 ივლისს, თბილისში დაიბადა. 1963 წელს დაამთავრა შოთა რუსთაველის სახელობის თეატრის სამსახიობო ფაკულტეტი. 1963 - 1993 წლებში მოღვაწეობდა შოთა რუსთაველის სახელობის თეატრში.
მისი თეატრალური დებიუტი ახალგაზრდულ ექსპერიმენტულ სპექტაკლში შედგა. რობერტ სტურუას აქტუალურ, მწვავე სპექტაკლში "ბრალდება“ ახალგაზრდა მსახიობმა ბრალმდებლის როლი ითამაშა. მისი გმირი, ოთარი გამოირჩეოდა მამხილებელი პათოსით, უხეში პირდაპირობით. ამის შემდეგ, მსახიობს ძირითადად უარყოფითი ხასიათების მქონე ადამიანების განსახიერება უწევს : სპექტაკლში "უარყოფითი მომხიბვლელობა“ და სხვა. მკვიდრდება რეპერტუარში: ნოდარ დუმბაძის "მზიან ღამეში“ (ავთო), ოტია იოსელიანის "სანამ ურემი გადაბრუნდება“ (დიტო), თამაზ ჭილაძის "მოულოდნელი სტუმარი“ (გაიოზი) და სხვა.
ამას მოსდევს კლასიკური სახეები : უილიამ შექსპირის "იულიუს კეისარი“ (ოქტავიოს კეისარი), ალექსანდრე ტოლსტოის "მეფე ივანე მრისხანეს სიკვდილი“ (ივანე მრისხანე), სოფოკლეს "ოიდიპოსი“ (ოიდიპოსი) და სხვა.
მისთვის პირველი კინონათლობა შედგა ფილმში "გიორგობისთვე“ 1966 წელს, რომელშიც ოთარის როლი შეასრულა. ოთარი სწორი, მაგრამ არადადებითი გმირია. უარყოფითი გმირის ამპლუა მას კინემატოგრაფიაშიც გადმოჰყვა: მომხიბვლელი, მაგრამ ეგოისტი ნოდარი ("ჩემი მეგობარი ნოდარი“, 1967 წელს), კაზა ჩხეტია ("დათა თუთაშხია“, 1978 წელს) და სხვა. მონაწილეობდა ტელეფილმებში: დავით კლდიაშვილის "ირინეს ბედნიერება“, 1974 წელს (აბესალო) და ლეო ქიაჩელის "გვადი ბიგვა“, 1977 წელს (არჩილ ფორია).
ხარაბაძე მრავალმხრივი შემოქმედი გახლდათ. გამოირჩეოდა მაღალი პროფესიულობით. შექმნილი აქვს ტელეთეატრის ციკლი: "პოეზიის 30 წუთი“ (1974), "ბედი ქართლისა“ (1975), "აკაკი წერეთელის მონოლოგი“ (1979), "ვაჟა-ფშაველას ნაანდერძევი“ (1983), "დავით კლდიაშვილის ნაამბობი“ (1985) და სხვა.
გამოცემული აქვს ბიბლიის, შოთას "ვეფხისტყაოსანის“, ილია ჭავჭავაძის ლექსების, აკაკი წერეთელის ლექსებისა და პოემა "თორნიკე ერისთავის“, ვაჟა-ფშაველას ლექსებისა და პოემების "ალუდა ქეთელაურის“ და "სტუმარ-მასპინძლის“, გალაკტიონ ტაბიძის და სხვა ცნობილი პოეტების ლექსების, ქართული ზღაპრების აუდიო ვერსიები.