"ტაქსის მძღოლს თავის არეში მრავლობითი დაზიანებები მიაყენეს და ე.წ. ტროსით მოახრჩვეს, კვალის დაფარვის მიზნით კი ცხედარი მიმდებარე ტერიტორიაზე, ორმოში დამარხეს" - ტაქსის მძღოლის განზრახ მკვლელობის ფაქტზე, პროკურატურამ სამ პირს ბრალი წარუდგინა - პალიტრა ვიდეო

საქართველოს პროკურატურამ მარნეულში, ტაქსის მძღოლის განზრახ მკვლელობის ფაქტზე, სამ პირს ბრალი წარუდგინა.

საქართველოს პროკურატურის ინფორმაციით, სამმა ბრალდებულმა, მათ შორის, ერთმა არასრულწლოვანმა, ტაქსის მძღოლს თავის არეში მრავლობითი დაზიანებები მიაყენა, ე.წ. ტროსით მოახრჩო და კვალის დაფარვის მიზნით ცხედარი მიმდებარე ტერიტორიაზე დამარხა.

„საქართველოს პროკურატურამ მარნეულის მუნიციპალიტეტში მომხდარი განზრახ მკვლელობის ფაქტზე სამ პირს ბრალდება წარუდგინა.

შინაგან საქმეთა სამინისტროს მიერ ჩატარებული გამოძიების შედეგად დადგინდა, რომ 20 მაისს თეთრიწყაროს მუნიციპალიტეტის სოფელ მარაბდაში სამმა ბრალდებულმა, მათ შორის, ერთმა არასრულწლოვანმა, ავტომანქანის დაუფლების მიზნით ტაქსის მძღოლს თავის არეში მრავლობითი დაზიანებები მიაყენა და ე.წ. ტროსით მოახრჩო. ბრალდებულებმა კვალის დაფარვის მიზნით ცხედარი ავტომანქანის საბარგულში მოათავსეს და მიმდებარე ტერიტორიაზე, ორმოში დამარხეს, რის შემდეგაც მოკლულის ავტომობილს დაეუფლნენ და მისი ნაწილებად დაშლა დაიწყეს.

სამართალდამცველებმა ორი პირი, მათ შორის, ერთი არასრულწლოვანი, 22 მაისს დააკავეს, ხოლო მესამე პირის მიმართ დაუსწრებლად იქნა გამოტანილი დადგენილება ბრალდების შესახებ. სამივე პირს ბრალი საქართველოს სისხლის სამართლის კოდექსის 109-ე მუხლის „ი“, „მ“ და „ნ“ ქვეპუნქტებით (განზრახ მკვლელობა ჩადენილი, ჯგუფურად, განსაკუთრებული სისასტიკით და ანგარებით) წარედგინათ, რაც სასჯელის სახედ და ზომად 16-დან 20 წლამდე ან უვადო თავისუფლების აღკვეთას ითვალისწინებს.

პროკურატურა, ბრალდებულებისთვის აღკვეთის ღონისძიების სახით პატიმრობის შეფარდების შუამდგომლობით, სასამართლოს კანონით დადგენილ ვადაში მიმართავს“, - ნათქვამია ინფორმაციაში.