"აუცილებლად ვიღაც უნდა მოკვდეს, რომ მერე გამოვიდეს მთელი საქართველო? სად არიან დედები, მამები? რატომ ტირით ტელევიზორებიდან?" - აქონდროპლაზიის დიაგნოზის მქონე ბავშვის დედის ემოციური მიმართვა - პალიტრა ვიდეო

მთავრობის სხდომის პარალელურად, მთავრობის ადმინისტრაციასთან აქონდროპლაზიის დიაგნოზის მქონე ბავშვების მშობლების აქცია მიმდინარეობს.

ისინი თავიანთი შვილების საკითხის ირგვლივ საქართველოს პრემიერ-მინისტრის, ირაკლი ღარიბაშვილის განცხადებას ელოდებიან. მათ იმედი აქვთ, რომ პრემიერ-მინისტრი მათ მოთხოვნებს დააკმაყოფილებს.

აქონდროპლაზიის დიაგნოზის მქონე ერთ-ერთი ბავშვის მშობლის, მაკუნა გოჩიაშვილის განცხადებით, მშობლები მზად არიან მოლაპარაკების მაგადისთან დასხდნენ.

„თუ თქვენ ამბობთ, რომ მაგიდასთან უნდა გადავინაცვლოთ, მაშინ გაგვიღეთ კარები და შემოვალთ. მზად ვართ, რომ მოლაპარაკებებმა მაგიდასთან გადაინაცვლოს”, - განაცხადა მაკუნა გოჩიაშვილმა.

მშობლები უკვე ორი კვირაა, რაც მთავრობის ადმინისტრაციასთან ათევენ ღამეს. ისინი მთავრობის წარმომადგენლებს თავიანთი შვილებისთვის საჭირო მედიკამენტის, „ვოზორიტიდის” შემოტანას და დაფინანსებას ითხოვენ.