"ჩვენ ბრძოლით და სისხლით მოვიპოვეთ საკუთარი დამოუკიდებლობა და თავისუფლება! საით მივდივართ? - დავბრუნდი სამშობლოში და ვეძებ საკუთარ ქვეყანას" - 9 აპრილის სიმბოლოდ ქცეული ქალი ნანა მახარაძე მიმართვას ავრცელებს
9 აპრილის სიმბოლო მარი-ნანა მახარაძე Facebook-ზე რუსთაველის გამზირზე მიმდინარე მოვლენებს ეხმაურება და წერს, რომ დაჩოქილი საქართველოთი ოკუპანტებს არასოდეს გავახარებთ.
მარი-ნანა მახარაძე სვამს კითხვას, ნუთუ ღირს ერთი კანონი ქართველი ხალხის ასეთ დაპირისპირებად.
სამშობლოში დაბრუნებული 9 აპრილის სიმბოლო ამბობს, რომ საკუთარ ქვეყანას ეძებს.
"საქართველოს კონსტიტუციის 78-ე მუხლის თანახმად, რომელიც ქვეყნის "ევროპულ და ევროატლანტიკურ სტრუქტურებში ინტეგრაციას" შეეხება, კონსტიტუციურმა ორგანოებმა თავიანთი უფლებამოსილების ფარგლებში, უნდა მიიღონ ყველა ზომა ევროპის კავშირსა და ჩრდილოატლანტიკური ხელშეკრულების ორგანიზაციაში საქართველოს სრული ინტეგრაციის უზრუნველსაყოფად. ფაქტია, რომ ჩვენი ქვეყანა მყარად ვერ დგას ორივე ფეხზე... "ცალ ფეხზე" დგომა მავანთ "ღირსების აყრად" მიაჩნიათ... დაჩოქილი საქართველოთი კი არასოდეს გავახარებთ ოკუპანტებს... ჩვენ ბრძოლით და სისხლით მოვიპოვეთ საკუთარი დამოუკიდებლობა და თავისუფლება! ბოლომდე ვფიქრობდი, რომ ჩვენმა განვლილმა გზამ თუ ისტორიამ რაღაც მაინც გვასწავლა... დავბრუნდი სამშობლოში და ვეძებ საკუთარ ქვეყანას!!! ნუთუ ღირს ერთი კანონი ქართველი ხალხის ასეთ დაპირისპირებად... საით მივდივართ?.... რა შედეგს მოიტანს ეს პოლარიზაცია? რატომ ხდება, რომ გაერო, ევროკავშირი, აშშ ჩვენთვის "რადიკალური ოპოზიციაა"? რატომ ხდება, რომ "აყვავებული ეკონომიკის" დემოკრატიული და თავისუფალი ქვეყნიდან გარბიან ადამიანები? რატომ ეშინიათ მომავლის ამ ქვეყანაში ახალგაზრდებს? და რატომ ვერ შევიგნეთ, რომ ჩვენ უკან დასახევი გზა არ გვაქვს... ჩვენი ადგილი ცივილიზებულ სამყაროშია, ჩვენ ვიმსახურებთ ღირსეულ ცხოვრებას", - წერს მარი-ნანა მახარაძე.