რა ვითარებაა რუსთავში, სადაც ცოტა ხნის წინ საცხოვრებელი კორპუსი ჩამოინგრა და რას ამბობს რუსთავის მერი ნინო ლაცაბიძე?
რუსთავში, რუსთაველის ქუჩაზე, სამსართულიანი საცხოვრებელი კორპუსის ნაწილი ჩამოინგრა.
ამ დროისთვის არსებული ინფორმაციით, შემთხვევის დროს ერთი ადამიანი მსუბუქად დაშავდა.
დაშავებული ნანგრევებიდან სამაშველო სამსახურის წარმომადგენლებმა ამოიყვანეს, რომელიც სასწრაფო-სამედიცინო დახმარების ჯგუფმა კლინიკაში გადაიყვანა.
შემთხვევის ადგილზე მივიდა რუსთავის მერი ნინო ლაცაბიძე. რუსთავის მერის განცხადებით, კორპუსის იმ ნაწილს, რომელიც ჩამოინგრა, გამაგრებითი სამუშაოები უტარდებოდა და მოსახლეობა უსაფრთხოების მიზნით გაყვანილი იყო.
„აღნიშნულ კორპუსს უტარდებოდა გამაგრებითი სამუშაო. ის ნაწილი, რომელიც ჩამონგრეულია, ყველაზე მძიმე მდგომარეობაში იყო, რაზეც დასკვნა გვქონდა. აღნიშნული ნაწილიდან მოსახლეობა უსაფრთხოების მიზნით გაყვანილი იყო და მუნიციპალიტეტი უხდიდა ქირას - პირველ სართულზე, სადაც წლების განმავლობაში იყო დაზიანება, ოჯახი გვყავდა ქირით გაყვანილი”, - განაცხადა რუსთავის მერმა.
ამ დროისთვის, ადგილზე შესაბამისი სამსახურების თანამშრომლები მუშაობენ, მიმდინარეობს ნანგრევებისგან გასუფთავება.