სოსო გოგაშვილი თბილისის საქალაქო სასამართლოს მოსამართლეს მიმართავს
სუს-ის უფროსის ყოფილი მოადგილე სოსო გოგაშვილი თბილისის საქალაქო სასამართლოს მოსამართლეს, გიორგი გელაშვილს მიმართავს.
"მე ვარ უკანონოდ დაკავებული ბიძინა ივანიშვილის მითითებების გამო. ჩემი საქმე მთლიანად აგებულია ყალბ და ფალსიფიცირებულ "მტკიცებულებებზე", რომლებიც 16 ივლისის ღამეს შემოიტანეს და ჩადეს ჩემს საცხოვრებელ სახლში ქ.თბილისი, ავთო ვარაზის 91-ში.
ჩემი დაკავებაც განხორციელდა უკანონოდ და ძალადობრივად, ასევე იძალადეს ჩემი ოჯახის წევრებზეც. სასამართლომ არ გაითვალისწინა არცერთი ჩვენ მიერ მოყვანილი ფაქტი და აღკვეთიც კი არ შეცვალა. მე არ ვაპირებ მივიღო მონაწილეობა ამ დადგმულ მასკარადში, რომელიც წოდებულია, როგორც სასამართლო, ხოლო იმართება და ხელმძღვანელობს ივანიშვილის დირექტივების მიხედვით. ამაზე მე მაქვს საკმაოზე მეტი მტკიცებულება, რასაც უახლოეს დღეებში გავასაჯაროებ.
ასევე, ჩემი გადაადგილება რუსთავის ციხიდან სასამართლომდე შეიცავს სიცოცხლისთვის და უსაფრთხოებისთვის დიდ რისკებს. აქედან გამომდინარე, უარს ვაცხადებ დავესწრო სასამართლო პროცესებს", - ნათქვამია სოსო გოგაშვილის განცხადებაში.