ალექსანდრე ჭავჭავაძის სახლ-მუზეუმში რუსმა ტურისტებმა ვიტრინა დაამსხვრიეს - გატყდა ერთ-ერთი ექსპონატი - მარაო - რა მოხდა წინანდლის მუზეუმში?
13 აგვისტოს, წინანდალში ალექსანდრე ჭავჭავაძის სახლ-მუზეუმში რუსი ტურისტების დაუდევრობას ექსცესი მოჰყვა. როგორც ჟურნალისტი ანა მარშანია სოციალურ ქსელში წერს ამბავი მის დას, რომელიც მუზეუმის დასათვალიერებლად იმყოფებოდა გიდმა უამბო.
"ჩემმა დამ, შაბათს, წინანდალში დასვენებისას, ალ. ჭავჭავაძის სასახლის ერთ-ერთი სივრცის დათვალიერებისას ნახა ალექსანდრეს ოქროს საათი, ნინოს მარაო და პერანგის საკინძეები. კვირას, განმეორებით, უფრო საფუძვლიანად სტუმრობისას შენიშნა, რომ ეს ვიტრინა ცარიელი იყო და დაინტერესდა, სად წაიღეს ექსპონატები?
გიდმა აუხსნა, რომ ეს ვიტრინა რუსმა ტურისტებმა დაამსხვრიეს. გიდის თქმით, რუს ტურისტებს ბავშვი თოკზე (რომლის იქით გადასვლა არ შეიძლება) დაუსვამთ, ბავშვი ქანაობდა, მერე უკან გადავარდნილა და ვიტრინა ჩამსხვრეულა.გიდის თქმით, ისეთი ზრიალი იყო, ეგონათ შენობა ჩამოიქცა და შემთხვევის შედეგად გატყდა ერთ-ერთი ექსპონატი - მარაო. (ეს ყველაფერი მერე აალაგეს და შეინახეს).მუზეუმის თანამშრომლებმა კვირას, ჩემს დას უთხრეს, რომ მთელი ყურადღება ექსპონატებზე გადაიტანეს და ამიტომ ტურისტებს ყურადღება ვერ მიაქციეს, რომლებიც მაშინვე გაიქცნენ!
ამან როგორც ჩემი დის, ასევე სხვა იქ მყოფი პირების აღშფოთება გამოიწვია, რადგან, რანაირად უნდა გაგექცეს მუზეუმიდან ოჯახი, რომელიც ექსპონატების ვიტრინას დაგილეწავს?! თან, სასახლის მერე, იმხელა ეზოა გასავლელი, ვინც წინანდალში ნამყოფია, კი მიხვდება, რამხელა უნიათობასთან გვაქვს საქმე.
აქვე, გიდმა ჩემს დას და მასთან ერთად მყოფებს ისიც უთხრა, რომ შიშობდნენ ყველაფერი მათ არ დაბრალებოდათ.
ამბის გაგრძელება გაინტერესებთ? დღეს ჩემმა კოლეგამ დარეკა წინანდლის მუზეუმში, სადაც ამ ყველაფრის მერე, ჟურნალისტს უთხრეს, რომ "არაფერი განსაკუთრებული არ მომხდარა, ვიტრინას შემთხვევით მიეჯახა ბავშვი, რუსი ტურისტები არსად გაქცეულან, ყველაფერი გავარკვიეთ და დალაგდა. ექსპონატები არ დაკარგულა, არც დაზიანებულა, ისინი რაშიც დაცული იყო, მხოლოდ ის ვიტრინა დაიმსხვრა, გადავრჩითო...
“ვინც ეს ამბავი ვიცოდით, დღის პირველი ნახევარი იმაზე ვნერვიულობდით, რა ცუდია, რომ რუსმა ტურისტებმა ვიტრინა დაამსხვრიეს, რა ცუდია, რომ მარაო გატყდა, რა ცუდია, რომ რუსები კურდღლებივით გაიქცნენ და რა ცუდია, რომ მუზეუმმა ეს ადამიანები ვერ შეაკავა.დღის მეორე ნახევარში, მუზეუმის პასუხის მერე კი იმაზე ვნერვიულობთ, რა კოშმარია, როცა ასეთი დაშინებული ხარ, იმალები, ხელს აფარებ და ამბობ, რომ "ისეთი არაფერი მომხდარა"...- წერს ჟურნალისტი.
აღნიშნულ საკითხთან დაკავშირებით წინანდლის მუზეუმი ოფიციალურ განცხადებას ავრცელებს:
"გვსურს ოფიციალური განმარტება გავაკეთოთ წინანდლის მამულში, ალექსანდრე ჭავჭავაძის სახლ მუზეუმში, მომხდარ შემთხვევასთან დაკავშირებით.წინანდლის მუზეუმს ყოველწლიურად 100 ათასზე მეტი დამთვალიერებელი სტუმრობს. ჩვენ მიერ მუზეუმის მართვის 15-წლიანი ისტორიის განმავლობაში რაიმე მსგავს ინციდენტს ადგილი არ ჰქონია.
სამწუხაროდ, ერთ-ერთი დამთვალიერებელი, კერძოდ კი, მშობლებთან ერთად მუზეუმის დასათვალიერებლად მოსული ბავშვი, უხერხულად მიეყრდნო ალექსანდრე ჭავჭავაძის ოთახის დამცავ ბარიერს, წონასწორობა დაკარგა და დაეჯახა ოთახში მდგარ ვიტრინას, რის შედეგადაც დაზიანდა ანა ბაგრატიონის ნაქონი მარაო.
პირველადი დათვალიერების შედეგად ვიმედოვნებთ, რომ მარაოს დაზიანებული მალები აღდგენას ექვემდებარება.მუზეუმში მუდმივად მიმდინარეობს ვიდეომონიტორინგი, შესაბამისად, აღნიშნული ინციდენტი დაფიქსირებულია მუზეუმის ვიდეოკამერების საშუალებით.
ინციდენტის შემდეგ მუზეუმმა მიმართა კანონით გათვალისწინებულ პროცედურას. პროცედურით გათვალისწინებული ყველა ეტაპის გავლის შემდეგ ნივთი გადაეგზავნება რესტავრატორს და სულ მალე ანა ბაგრატიონის მარაო დაუბრუნდება საგამოფენო სივრცეს.“