"ჩემს საქმეში მთავარი მოწმე მირეკავს, მიხდის ბოდიშს და მაბარებს აღსარებებს, თუ როგორ დაავალეს პროვოკაციის მოწყობა" - ოთო აბესაძე შსს-სა და პროკურატურას მიმართავს
"ჩემს საქმეში მთავარი მოწმე და აგენტ-პროვოკატორი ზვიად ჩიხლაძე დაჰკითხეთ" - ამის შესახებ ეკონომისტი ოთო აბესაძე სოციალურ ქსელში წერს და შინაგან საქმეთა სამინისტროსა და პროკურატურას მიმართავს.
აბესაძის თქმით, მისი საქმის მთავარი მოწმე უბოდიშებს და აბარებს აღსარებებს, თუ როგორ დაავალეს პროვოკაციის მოწყობა.
"ჩემს საქმეში მთავარი მოწმე და აგენტ-პროვოკატორი ზვიად ჩიხლაძე დაჰკითხეთ. ერთ წელზე მეტია მაქვს მიმართვა გაკეთებული. ეს ადამიანი მწერს და მირეკავს, მაბარებს აღსარებებს და მიხდის ბოდიშს. ანუ რა გამოდის? ვისაც ქრთამი მოვთხოვე (გავმართლდი ქრთამში) და ვინც მიწერდა და მემუშავებოდა, ახლა რატომ მიბოდიშებს და ჰყვება ისტორიას?
მე ვერ ჩავუტარებ გამოკითხვას. მეტიც, სტაჟიან აგენტ-პროვოკატორს არ დაველაპარაკები. მწერს, მირეკავს, მიბოდიშებს და მაბარებს აღსარებებს, თუ როგორ დაავალეს პროვოკაციის მოწყობა. ვიგინდარა და აღზევებული მდაბიო ყოფილი ჩინოვნიკის პროვოკაციის მსხვერპლი ვარ მისი აგენტის, ზვიად ჩიხლაძის ხელით და გამოჰკითხეთ ეს კაცი. როგორც სასამართლოზე თქვა, მუშაობს GWP-ს ადმინისტრაციაში. არ გაგიჭირდებათ მოძებნა", - წერს ოთო აბესაძე.
ცნობისთვის, მერიის ყოფილი მაღალჩინოსანი ოთო აბესაძე ქრთამის აღების ბრალდებით სუს-მა 2017 წელს დააკავა. გამოძიების თანახმად, აბესაძემ მდინარე მტკვარზე გარკვეული კონსტრუქციის აშენებისთვის საჭირო ნებართვის მისაღებად და ნებართვის მიღებამდე მშენებლობის წარმოების მფარველობის სანაცვლოდ მოქალაქეს 3 ათასი დოლარი ქრთამის სახით გამოართვა. იგი პატიმრობიდან 2018 წლის იანვარში გათავისუფლდა.