loader

შსს განცხადებას ავრცელებს - „გვსურს გამოვეხმაუროთ ტელეკომპანია „პირველის“ მიერ გავრცელებულ მცდარ და ცილისმწამებლურ ინფორმაციას" - პალიტრა ვიდეო

მთავარი ყველა ვიდეო საავტორო ტექნოლოგიები ახალი ამბები საზოგადოება შოუბიზნესი მოზაიკა სპორტი ვიდეოგაკვეთილები მსოფლიო მნიშვნელოვანი ინფორმაცია PALITRANEWS სხვადასხვა

შსს განცხადებას ავრცელებს - „გვსურს გამოვეხმაუროთ ტელეკომპანია „პირველის“ მიერ გავრცელებულ მცდარ და ცილისმწამებლურ ინფორმაციას"

შინაგან საქმეთა სამინისტრო მცდარსა და ცილისმწამებლურს უწოდებს გავრცელებულ ინფორმაციას, რომ პანკისის ხეობაში ერთ-ერთი მოქალაქის გარდაცვალების მიზეზი „პოლიციის პიკაპით შეჯახება გახდა“.

უწყების განმარტებით, სოფელ საკობიანოში მომხდარ ფაქტზე სამართალდამცველების მიერ ამ ეტაპზე ჩატარებული საგამოძიებო ღონისძიებების შედეგად საპოლიციო ტრანსპორტის სავარაუდო მონაწილეობა ავტოსაგზაო შემთხვევაში არ დასტურდება.

„გვსურს გამოვეხმაუროთ ტელეკომპანია „პირველის“ მიერ გავრცელებულ მცდარ და ცილისმწამებლურ ინფორმაციას, თითქოს პანკისის ხეობაში ერთ-ერთი მოქალაქის გარდაცვალების მიზეზი პოლიციის პიკაპით შეჯახება გახდა. შინაგან საქმეთა სამინისტროს კახეთის პოლიციის დეპარტამენტი ახმეტის მუნიციპალიტეტის სოფელ საკობიანოში მომხდარ ფაქტს სისხლის სამართლის კოდექსის 276-ე მუხლით იძიებს. პოლიციაში მიღებული შეტყობინებით, მიმდინარე წლის 28 ივნისს, საკუთარი ძმის მიერ სოფელ საკობიანოს საავტომობილო გზაზე ნანახი იქნა 1975 წელს დაბადებული ა.ჭ., რომელიც იმყოფებოდა ნასვამ მდგომარეობაში და აღენიშნებოდა სხვადასხვა დაზიანება. ოჯახის წევრის მიერ იმავე ღამეს ა.ჭ. მიყვანილ იქნა საცხოვრებელ სახლში, სადაც დილას გარდაცვლილი დახვდა.

პოლიციამ ფაქტის შესახებ მიღებული შეტყობინებისთანავე დაიწყო საგამოძიებო ღონისძიებები, ჩაინიშნა შესაბამისი სასამართლო-სამედიცინო ექსპერტიზები, ამ დრომდე ინტენსიურ რეჟიმში ტარდება საგამოძიებო ღონისძიებები.

კიდევ ერთხელ ხაზგასმით აღვნიშნავთ, რომ სამართალდამცველების მიერ ამ ეტაპზე ჩატარებული საგამოძიებო ღონისძიებების შედეგად საპოლიციო ტრანსპორტის სავარაუდო მონაწილეობა ავტოსაგზაო შემთხვევაში არ დასტურდება. აღნიშნულ ფაქტზე გამოძიების დასრულებამდე ინფორმაციის გავრცელება, რომ თითქოს მოქალაქე პოლიციის მანქანის შეჯახების შედეგად გარდაიცვალა, არის საზოგადოების მიზანმიმართულად შეცდომაში შეყვანა“, - ნათქვამია შსს-ს განცხადებაში.