უკრაინისა და მოლდოვისთვის კანდიდატის სტატუსის მინიჭების მხარდამჭერი რეზოლუციის მიღებას ევროპარლამენტში ტაშით შეხვდნენ - პალიტრა ვიდეო

ევროპარლამენტმა უკრაინისა და მოლდოვისთვის კანდიდატის სტატუსის მინიჭებას მხარი დაუჭირა. ევროპარლამენტმა შესაბამისი მხარდამჭერი რეზოლუციაც მიიღო.

უკრაინისა და მოლდოვისთვის კანდიდატის სტატუსის მინიჭების მხარდამჭერი რეზოლუციის მიღებას ევროპარლამენტში ტაშით შეხვდნენ.

რეზოლუციის ტექსტში საქართველოც არის ნახსენები და ნათქვამია, რომ ისიც უნდა გახდეს კანდიდატი მას შემდეგ, რაც ის დაასრულებს აუცილებელი რეფორმების გატარებას.

ამასთან, ევროპარლამენტი რეზოლუციაში აცხადებს, რომ არ უნდა იყოს არანაირი „სწრაფი გზა“ ევროკავშირში წევრობისთვის.

„წევრობა უნდა მიენიჭოს მხოლოდ დამსახურების საფუძველზე და მხოლოდ მას შემდეგ, რაც კრიტერიუმების შესრულება მოხდება. ევროკავშირის გაფართოება მის პირად ინტერესებში შედის“, - ნათქვამია რეზოლუციის ტექსტში.

რეზოლუციას 529 ევროდეპუტატმა დაუჭირა მხარი, 45 წინააღმდეგ წავიდა, 14-მა კი თავი შეიკავა.

„პარლამენტი მოუწოდებს უკრაინის, მოლდოვის რესპუბლიკის და საქართველოს ხელისუფლებას, ცალსახად წარმოაჩინონ თავიანთი პოლიტიკური გადაწყვეტილება თავიანთი ხალხის ევროპული ამბიციების განსახორციელებლად, დააჩქარონ რეფორმები, რათა რაც შეიძლება მალე შესრულდეს ევროკავშირში გაწევრიანების კრიტერიუმები.

უკრაინელები, მოლდოველები და ქართველები იმსახურებენ ცხოვრებას თავისუფალ, დემოკრატიულ და კეთილდღეობის მქონე ქვეყნებში, რომლებიც ევროპული ოჯახის ამაყი და ერთგული წევრები არიან“, - აცხადებენ ევროპარლამენტარები.

ცნობისთვის, უკრაინისთვის, მოლდოვისა და საქართველოსთვის კანდიდატის სტატუსის მინიჭებაზე საბოლოო გადაწყვეტილება ევროკავშირის წევრი ქვეყნების სამიტზე იქნება მიღებული, რომელიც ბრიუსელში დღეს დაიწყება.