"შხამად გექცეს, რაც შენთვის ვიწვალე" - რას ამბობს ხარაგაულის საკრებულოს თავმჯდომარე პრეზიდენტის მისამართით დაწერილ სკანდალურ კომენტარზე
ხარაგაულის მუნიციპალიტეტის საკრებულო გუშინდელი დღიდან სოციალურ ქსელში განხილვის საგანია. საქმე ისაა, რომ მას შემდეგ, რაც პრეზიდენტმა მოსმენების კანონს ვეტო დაადო, აღნიშნული ნიუსის ქვეშ, საკრებულოს ოფიციალური გვერდის სახელით, სალომე ზურაბიშვილის მისამართით შეურაცხმყოფელი კომენტარი დაიწერა.
"შხამად გექცეს, რაც შენთვის ვიწვალე და ვიშრომეთ, ქ-ნო სალომე. დღეს პრემიერის გამოსვლაც დაამუნათე. შენს რეზიდენციაში იმდენი ქმრის ნათესავები გყავს, იმათ მაინც დაუჯერე. ყოველ შენს გამოსვლაზე სისულელეებს აბრეხვებ. დაოკდი და ოცნებას და ბიძინას დილა-საღამოს სანთლები აუნთე, მანდ რომ ბრძანდები... არ გიცნობდე მაინც" - წერია პრეზიდენტის ნიუსის კომენტარებში.
"პალიტრავიდეო" ხარაგაულის მუნიციპალიტეტის საკრებულოს თავმჯდომარეს, მანანა ბარბაქაძეს დაუკავშირდა, რომელიც ამბობს, რომ ეს მისი პირადი აზრია და მან საკუთარი მოსაზრება საკუთარ "ფეისბუკგვერდზე" დაწერა, თუმცა ტექნიკური ხარვეზის გამო ოფიციალურ გვერდზე მოხვდა.