ამ წუთებში "ნაციონალური მოძრაობის" წევრები რუსთავის ციხისკენ ავტოკოლონებით მიემართებიან - პალიტრა ვიდეო

“ნაციონალური მოძრაობის” წევრები, მხარდამჭერებთან ერთად, რუსთავის მე-12 პენიტენციური დაწესებულებისკენ ავტოკოლონებით მიემართებიან.

როგორც “ინტერპრესნიუსს” პარტიის წევრმა ირაკლი ნადირაძემ განუცხადა, ციხესთან გაიმართება აქცია, სადაც მესამე პრეზიდენტის, მიხეილ სააკაშვილის მკურნალობისთვის საზღვარგარეთ გადაყვანას მოითხოვენ.

კითხვაზე, იქნება თუ არა დღევანდელ აქციაზე პარტიის თავმჯდომარე ნიკა მელია, როგორც ნადირაძემ განმარტა, ნიკა მელია შეიძლება იყოს ბათუმში ან დაკავებული იყოს სხვადასხვა საორგანიზაციო საკითხით, “იმიტომ, რომ ეს აქცია არ არის ერთჯერადი, რასაც ორგანიზება სჭირდება”.

“აქ არიან მიხეილ სააკაშვილის მხარდამჭერები, იმიტომ, რომ მიხეილ სააკაშვილის მხარდაჭერა და მისი სიცოცხლის გადარჩენა სცილდება ვიწროპარტიულ ინტერესს. მსვლელობა დაანონსდა რუსთავის ციხემდე. შესაბამისად, შემოგვიერთდნენ როგორც პარტიის, ისე სამოქალაქო საზოგადოების წარმომადგენლები. მიხეილ სააკაშვილის ჯანმრთელობის მდგომარეობა კრიტიკულია. ამიტომ, მისი სიცოცხლის გადასარჩენად ყველაფერი უნდა გავაკეთოთ. აქტიურობა ორი მიმართულებითაა: საერთაშორისო მიმართულებით მივხედავთ პარტიის ლიდერების ვიზიტებს უცხოეთში და ადგილზე აქციები გაიმართება”, - განაცხადა ირაკლი ნადირაძემ.

მისი თქმით, აქციები რეგიონებშიც გაიმართება, რის შემდეგაც სამოქმედო გეგმებს მიხეილ სააკაშვილის ოჯახთან ერთად დასახავენ.